Ministru Asuntu Parlamentár no Komunikasaun Sosiál, Francisco Jerónimo hamutuk ho ekipa redasaun STL, iha edifísiu Osindo Surikmas, kuarta (08/07). Imajen/Mídia-MAPKOMS

DILI, 08 jullu 2020 (TATOLI) – Ministru Asuntu Parlamentár no Komunikasaun Sosiál, Francisco Jerónimo hala’o vizita kortezia ba antigu jornál imprimi nasionál rua hanesan Suara Timor Lorosa’e (STL) no Jornál Independente atu hatene difikuldade no rona preokupasaun ne’ebé mídia privadu sira infrenta.

“Vizita kortezia ne’e hanesan ha’u-nia obrigasaun nu’udar Ministru atu mai vizita ba mídia sira hotu atu haree sira-nia problema no preokupasaun saida maka hasoru. Dala barak ita rona ema ko’alia iha sorin-sorin, tanba ne’e ohin liuhosi vizita ne’e bele rona rasik. Ita tau idea hamutuk para ita foti desizaun,” dehan Ministru Jerónimo hafoin ramata vizita, iha edifísiu STL, Osindo Surikmas, kuarta ne’e.

Governante ne’e nota katak problema ne’ebé durante ne’e mídia nasionál sira maioria infrenta maka problema finanseiru.

“Ida-ne’e maka ohin ha’u rona no haree. Ha’u rona informasaun sira no interpreta ita-nia problema maka finanseiru no buat seluk maka  husu Governu tenke kria kooperasaun ho parte mídia sira,” nia subliña.

Kona-ba apoiu Governu ba mídia sira, Ministru hateten provizoriamente daudaun ne’e seidauk bele promete buat balun tanba sei la’o hela ho Dotasaun Orsamentu Temporáriu.

“Ita bo’ot sira tenke hatene ami-nia kondisaun, la’ós dehan lakohi tulun mídia sira maibé ho orsamentu temporáriu ita labele halo buat ida maibé kuandu ita-nia orsamentu normál maka Governu sei haree hodi tulun mídia sira,” nia akresenta.

Kada tinan Governu prevee pur volta $50.000 hodi apoiu mídia privadu nasionál sira liuhosi publisidade no hanesan kliente ba mídia sira.

Tuir Ajenda, governante ne’e sei kontinua halo vizita kortezia ba mídia privadu sira hodi haree no rona preokupasaun mídia sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here