Ministru Asuntu Parlamentár no Komunikasaun Sosiál, Francisco Martins da Costa Jerónimo. Imajen Tatoli/Egas Cristovão

DILI, 08 jullu 2020 (TATOLI) – Sekretaria Estadu Komunikasaun Sosiál (SEKOMS) daudaun ne’e inisia ona esbosu Lei Radiodifuzaun no halibur ona ideia husi entidade relevante ne’e, tanba ne’e Ministériu Asuntu Parlamentár no Komunikasaun Sosiál (MAPKOMS) hakarak aselera prosesu ne’e.

Ministru Asuntu Parlamentár no Komunikasaun Sosiál, Francisco Jerónimo, hateten nia parte hakarak atu aselera prosesu elaborasaun esbosu Lei Radiodifuzaun Hodi bele regulariza rádiu no televizaun bainhira fó sai informasaun ho di’ak liután.

“Prioridade maka Lei Radiodifuzaun tenke prepara halo didi’ak, karik iha tinan 2020 no 2021 tenke iha ona para ita bele regulariza divulgasaun informasaun husi mídia sira”, tenik Ministru Jerónimo iha edifísiu STL, Osindo Surikmas, kuarta ne’e.

Nia dehan, durante mandatu sei haree buat ne’ebé prioridade ba ministériu hodi bele aselera iha peosesu ezekusaun programa.

“Asuntu importante sira ezemplu lei ne’ebé Prezidente Repúblika veta tenke mai filafali iha parte ministériu hodi no mós RTTL nia problema barak maka presiza tau atensaun. Ema ida de’it kakutak loron kalan tenke dulas atu hadi’a sasán sira ne’e,” nia akresenta.

Antes ne’e, SEKOMS liuhosi Diresaun Nasionál Diseminasaun Informasaun (DNDI) konvoka enkontru ho Conselho de Imprensa (KI), reprezentante mídia nasionál inklui Timor-Leste Press Union (TLPU) no Asosiasaun Jornalista Timor-Leste (AJTL) hodi halibur opiniaun kona-ba artigu balun iha esbosu Lei Radiodifuzaun.

Artigu ne’ebé diskute maka kona-ba aplikasaun koima no sansaun ba mídia sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here