Ministru Korodenadór Asuntu Ekonómiku, Joaquim Amaral, Imajen/MKAE

DILI, 08 jullu 2020 (TATOLI) – Ministru Koordenadór Asuntu Ekonómiku, Joaquim Amaral, hateten nia parte horiseik simu audiénsia husi jestór kompañia Heineken no iha audiénsia refere parte kompañia rasik informa katak daudaun hasoru difukuldade durante halo investimentu iha Timor-Leste.

“Sira informa kona-ba difikuldade ne’ebé kompañia hasoru, liuliu kona-ba sira-nia volume komersiál ne’ebé monu tanba ne’e sira husu Estadu atu haree karik iha posibilidade bele tulun kompañia sira ne’ebé iha difikuldade,” tenik Ministru Joaquim Amaral ba Agência Tatoli hafoin reuniuan Konsellu Ministru iha Palásiu Governu, kuarta ne’e.

Governante ne’e dehan, kompañia estranjeiru ne’e nia volume komersiál tun antes situasaun Estadu Emerjénsia no surtu COVID-19, tanba iha serveja kompetitór seluk iha merkadu Timor-Leste.

“Preferénsia ema sira ne’ebé hemu serveja ne’e gosta hili produtu foun ne’ebé sira nian grau alkól a’as liu, entaun kompañia Heineken lakon nia merkadu no nia volume fa’an menus,” Ministru akresenta.

Kona-ba apoiu saida maka parte Governu sei apoiu ba kompañia hodi kontinua halo sira-nia investimentu serveja iha Timor-Leste, tuir governante ne’e parte Governu sei haree no estuda didi’ak nia problema.

“Konserteza Governu mós sei estuda hela nian problema ne’ebé sira aprezenta maka ita halo analiza hafoin haree opsaun hodi ezekutivu sira foti desizaun hodi halo kama’an sira atubele kontinua opera iha Timór,’ nia subliña.

Heineken asina akordu investimentu ho Governu Timor-Leste iha janeiru 2015 no akordu ba rai no plantasaun Hera asina iha juñu 2015, maibe produsaun hahú iha janeiru 2017.

Iha Timor-Leste Heineken hanesan investór estranjeiru dahuluk ne’ebé maka investe iha setór fabrikasaun ne’ebé oras ne’e daudaun kria empregu direta no indireta ba timor-oan hamutuk 600 resin.

Plantasaun multi bebida Heineken gasta ona millaun $38 hodi harii ho klase mundiál no sei prodúz serveja oin-oin ho marka internasionál hanesan,  Bintang, Tiger, ABC,  inklui bebida naun alkól seluk tan.

Heineken iha mundu nu’udar serveja internasionál ne’ebé fa’an ona iha nasaun 170 resin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here