Primeiru-Ministru, Taur Matan Ruak, hafoin fó pose ba membru Komisaun Elaborasaun Planu Rekuperasaun Ekonómika iha Salaun PCM, Palásiu Governu, kinta (18/06). Imajen Tatoli/António Gonçalves

DILI, 08 jullu 2020 (TATOLI) – Prezidente Komisaun ba Elaborasaun Planu Rekuperasaun Ekonómika, Rui Augusto Gomes, halo aprezentasaun ida ba Konsellu Ministru (KM) kona-ba rekomendasaun ba medida kurtu prazu, iha faze dahuluk mitigasaun husi impaktu krize COVID-19.

Ministru ba Prezidénsia Konsellu Ministru, Fidelis Manuel Leite Magalhães, haktuir durante aprezentasaun Prezidente Komisaun ne’e aprezenta dadus husi konjuntura internasionál ne’ebé COVID-19 afeta iha nível mundiál ba rendimentu ho kontratasaun boot ba atividade ekonómiku hahú ho depresaun boot.

“Iha tinan 1929, saúde kauza direta no indiretamente ema millaun resin maka mate ona no iha edukasaun eskola barak tebes maka taka ona no redusaun tomak ba númeru labarik sira ne’ebé asesu ba eskola. Aprezentasaun ne’e mós ko’alia kona-ba kontestu Timor-Leste nian, diagnóstiku ba situasaun ekonómiku-sosiál iha país ne’e molok COVID-19 no impaktu husi Coronavírus foun iha Timor-Leste,” relata Ministru Fidelis hafoin ramata reuniaun ezekutivu iha Palásiu Governu, kuarta ne’e.

Nia hatutan, haree ba medida hirak ne’ebé Governu adopta ona durante vijénsia Estadu Emerjénsia kontribui tebes hodi asegura postu servisu no apoia empreza no mós hodi mantein nível konsumu ba traballadór no ba família sira, prevee nesesidade atu mantein ka kria medida foun iha 2020, hodi apoia hatán ba nesesidade bázika sidadaun sira nian no apoia traballadór sira iha setór informál, mantein postu traballu no rendimentu inklui mantein empreza sira ne’ebé iha ona merkadu.

Governu sei kontinua analiza rekomendasaun sira husi komisaun ne’e ho objetivu desidi medida kurtu prazu hirak ne’ebé maka sei implementa iha 2020 hodi haree ba mitigasaun impaktu husi krize COVID-19 nian.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here