Ró Haksolok. Imajen/Dok. ZEESM

DILI, 08 jullu 2020 (TATOLI) – Liuhosi reuniaun Konsellu Ministru (KM) Governu aprova projetu rezolusaun ne’ebé aprezenta hosi Primeiru-Ministru, Taur Matan Ruak, kona-ba konkluzaun ba konstrusaun Ró Haksolok.

Ministru ba Prezidénsia Konsellu Ministru, Fidelis Manuel Leite Magalhães, hateten ho rezolusaun ne’e Governu sentrál transfere fali prosesu sira hotu ba Rejiaun Administrativa Espesiál Oé-cusse Ambeno (RAEOA) hodi lori prosesu ne’e ba oin, tanba antes ne’e prosesu ba Ró Haksolok responsabiliza husi Governu sentrál.

“Projetu atu halo akizisaun ba Ferry Ró ne’e, aleinde nia natureza nasionál ba interesse públiku hodi hadi’ak no hasa’e rede komunikasaun nasonál liuhosi hadi’ak ligasaun iha Kosta Norte nasaun nian no kria ligasaun ho illa iha indonézia nian ne’ebé besik, objetivu prinsipál ida maka la izola tan rejiaun Oé-cusse Ambeno”, relata Ministru Fidelis hafoin ramata reuniaun KM iha Palásiu Governu.

Governante ne’e hatutan, estabelese iha RAEOA nu’udar ema koletiva públika ne’ebé responsável hodi lori prosesu negosiasaun no ba promosaun hodi halo dilijénsia ne’ebé presiza hodi ramata konstrusaun ba Ró Haksolok

“Órgaun sira husi RAEOA maka kaer responsabilidade tomak husi prátika ba aktu ne’ebé relasiona ho jestaun ba kontratu ne’ebé selebra ona ho Atlantic Eagle Ship building ne’ebé halo konstrusaun ba ró ne’ebé tula naha no pasajeiru,’ tenik Fidelis.

Daudaun ne’e Ró Haksolok iha sidade Figuerra da Voz, Portugál, tanba iha problema kapasidade finanseira husi kompañia ne’ebé hanesan responsável ba konstrusaun Ró-ahi ne’e.

Ró Haksolok ho kustu millaun €13,7 inaugura iha loron 26 maiu 2017 iha sidade Figuerra da Voz, Portugál no tuir informasaun sei to’o iha outubru 2017, maibé tanba problema internal husi kompaña Atlantic Eagle Ship Building ho sub-kontratór maka to’o agora ró seidauk mai.

Ró ne’e rasik iha kapasidade atu tula ema na’in-377 no karreta hamutuk 15.

Enkuantu prosesu konstrusaun Ró Haksolok ninia kontratu asina iha 2014 entre Governu Timor-Leste no empreza portugés.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here