Vise-Xefe Bankada KHUNTO, Deputada Olinda Guterres. Imajen/Egas Cristovão

DILI, 08 jullu 2020 (TATOLI)—Deputada Bankada Parlamentár Kmanek Haburas Unidade Nasionál Timor Oan (KHUNTO), Olinda Guterres, keixa ona Deputada na’in-rua hosi Bankada Congresso Nacional da Reconstrução de Timor (CNRT), Deputada Maria Fernanda Lay no Deputada Virgínia Ana Belo.

Deputada Olinda Guterres, hateten kazu ne’e nia parte keixa kualidade hanesan Xefe Bankada KHUNTO iha Parlamentu Nasionál.

“Ohin, loron 8 fulan-jullu, ha’u-nia advogadu privadu keixa ona señora Deputada Maria Fernanda Lay no Deputada Virgínia Ana Belo ba Ministériu Públiku. Loloos ne’e, prosesu ne’e ha’u keixa de’it deputada Maria Fernanda Lay ne’ebé ‘asalta’ ha’u maibé tanba kontinuasaun Deputada Virgínia hakat liu mai ha’u-nia fatin atu tuku mate ha’u, entaun ha’u kesar sira-na’in rua dala ida de’it,” dehan Deputada Olinda Guterres ba jornalista sira iha resintu Parlamentu Nasionál, kuarta ne’e.

Razaun Deputada KHUNTO ne’e keixa tanba konsidera hanesan krime boot ida hasoru ema ho idade avansadu entaun tribunál mak sei tesi-lia “sé mak sala no sé mak loos” iha justisa nia oin.

“Sira ho kondisaun fíziku mai ataka ha’u. Tanba buat ida ‘Pirata’ ne’e ba ami-nia Makasae (OSSU-Viqueque) ne’e “Pi” ne’e dehan ‘Ita’ no “Rata” ne’e dehan ‘liurai’. Entaun ha’u dehan “Ita Liurai”, nia esplika.

Keixa ne’e Deputada Olinda Guterres asina no hato’o ona ba Ministériu Públiku liuhosi advogadu privadu.

“Ha’u labele fó hatene ha’u-nia advogadu nia naran bai mi atu hatene. Ita-boot sira nu’udar jornalista, la’ós atu hatene fali ha’u-nia advogadu nia naran,” Xefe Bankada KHUNTO ne’e hateten.

Hatán ba kestaun ne’e, Deputada Bankada CNRT, Virgínia Ana Belo, prontu ba hatán bainhira hetan notifikasaun hosi Ministériu Públiku.

“Ha’u prontu no preparadu ba kualkér momentu bainhira mak Ministériu Públiku hakarak notifika. Maibé, atu fó hanoin ba agvogadu atu lee took artigu 94 Konstituisaun ninian para hodi haree prosesu ne’e la’o ka lae. Ha’u nein prepara advogadu ida, ne’ebé ha’u hein notifikasaun,” Deputada Bankada CNRT ne’e hateten hodi fó resposta ba keixa ne’ebé Deputada Olinda Guterres halo ona.

Deputada Virgínia Belo Ana Belo, espera prosesu kazu ne’e lalais di’ak liután.

Tuir Konstituisaun RDTL artigu 94 (Imunidade), alínea 1 hateten, deputadu sira la hatán ba lia sivíl, lia kriminál eh lia, tan sira-nia votu no sira-nia hanoin bainhira hala’o daudaun kna’ar.

Alínea 2 hosi artigu ne’e fundamenta, imunidade parlamentár nian bele hasai tiha tuir buat ne’ebé hakerek iha Parlamentu Nasionál nia Rejimentu.

Jornalista : Evaristo Soares Martins

Editór        :  Cancio Ximenes

HAKEREK NO HATÁN

Please enter your comment!
Please enter your name here