BNCTL Sukursál Dili. Imajen/Espesiál

DILI, 08 jullu 2020 (TATOLI) – Iha loron 05 juñu ne’e Prezidente Repúblika, Francisco Guterres ‘Lú Olo’, promulga ona Dekretu-Lei atu Estadu reembolsa porsentu 60 osan-funan ba sidadaun, organizasaun koletiva, emprezáriu no empreza ne’ebé iha kréditu husi finansiadór sira (banku ka instituisaun finanseira).

Ba asuntu ne’e, foin lalais Banku Nasionál Komérsiu Timor-Leste (BNCTL, sigla portugés) apela ba kliente sira atu hein informasaun ofisiál husi entidade relevante.

“Relasiona ho Dekretu Governu ne’ebé dekreta ona husi Prezidente Repúblika kona-ba fasilidade ka subsídiu selu funan porsentu 60 ba empréstimu husi banku sira, ho respeitu ami husu ba kliente sira atu hein anúnsiu ofisiál husi entidade sira hanesan ministériu relevante no entidade bankária sira,” refere nota imprensa ne’ebé Agência Tatoli asesu kuarta ne’e.

Anúnsiu husi entidade relevante sei inklui mekanizmu, prosedimentu, kritéria detalladu, no pasu atu aplika no hetan fasilidade ne’e.

“Husu ba ita bo’ot sira atu evita lakon tempu ba forma iha banku no husu informasaun enkuantu prosedimentu loloos seidauk hatúr no divulga husi meiu ofisiál sira ba asuntu ne’e,” apela Banku Komérsiu.

BNCTL partikularmente sei divulga informasaun ba kliente sira liuhosi pájina ofisiál kona-ba prosedimentu no rekezitu bainhira fasilidade husi Estadu ne’e prátikamente disponibiliza ona ba kliente sira.

Nune’e, Banku Estatál ne’e informa, karik iha pergunta ruma bele kontaktu sukursál BNCTL ne’ebé besik liu  ka liga ba call center 333 iha loron no oras servisu.

Tuir Dekretu-Lei ne’ebé promulgadu ona, ema, organizasaun no empreza ne’ebé iha kréditu sei selu de’it osan-funan porsentu 40 ba finansiadór ne’ebé fornese émprestimu.

Estadu Timor-Leste sei selu osan-funan porsentu 60 ba finansiadór ne’ebé fornese kréditu ba timor-oan, organizasaun koletiva lahó orientasaun lukrutiva ho sede iha Timor-Leste, emprezáriu komersiál individuál nia naran no empreza rejistada.

Dekretu-Lei ne’e la aplika ba atividade telekomunikasaun, indústria estrativa no servisu finanseiru.

Benefisiáriu sira ne’ebé Estadu sei fó apoiu finanseiru mak iha kréditu ho klasifikasaun ‘standard’ ka ‘under supervision’ ne’ebé la aplikável ba kréditu sira ne’ebé iha fulan-rua antes banhira Dekretu-Lei ne’e tama iha vigór viola akordu kréditu nian no kumpre obrigasaun hotu ne’ebé Estadu ka entidade públika seluk regula, hanesan selu impostu no seguransa sosiál.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here