Prezidente ANC, João Olívio Freitas, halo konferénsia imprensa hodi hato’o relatóriu annuál 2019. Imajen Tatoli/Natalino Costa

DILI, 07 jullu 2020 (TATOLI) – Hafoin restaura independénsia, iha tinan 2019 ne’e Timor-Leste foin iha númeru díjitu identifikasaun marítima ba ró hanesan identidade úniku.

Prezidente Autoridade Nasionál Komunikasaun (ANC sigla portugé), João Olívio Freitas hateten, bazeia ba relatóriu annuál servisu ANC nian ba tinan 2019, hatudu katak Timor-Leste foin dahuluk hetan númeru díjitu ba ró ne’ebé rejista direta husi autoridade ne’e rasik.

“Iha tinan 2019, ba dahuluk ita hetan númeru díjitu hafoin ANC antes ne’e koordena ho Diresaun  Nasionál Trasporte Maritima no Ministru Transporte no Komunikasaun, José Agostinho da Silva haruka karta ida ba Unidade Telekomunikasaun Internasionál (ITU, sigla inglés) no ita hetan númeru 550 hanesan díjitu identifikaun marítima liuhosi ANC,” tenik Prezidente ANC liuhosi konferénsia imprensa, bainhira hato’o rezultadu servisu annuál 2019, iha Salaun ANC, Caicoli, tersa ne’e.

Tuir Jerente ne’e, númeru ba ró ne’e ho objetivu hafasil halo detesaun ba ró sira husi nasaun seluk tama ne’ebé tama ba zona Timor-Leste.

“Ezemplu númeru díjitu identifikaun marítima iha Timor-Leste, ANC iha karreta atu halo monotorizasaun ida, bainhira ami sai ba li’ur, ami bele detekta ró sira ne’ebé maka para iha portu ne’ebá no ró sira ne’e mai ho bandeira husi nasaun ne’ebé?,” João Oliveira akresenta.

Ró sira husi Indonézia, Gvernu Indonéziu aloka ona númeru identidade úniku, nune’e bainhira sira to’o Timor-Leste no sira halo transmisaun ANC bele akapta katak ró ne’e husi nasaun ne’ebé.

Aleinde ida ne’e, Prezidente ANC haktuir, bazeia ba relatóriu servisu autoridade konsege hasai regulamentu ba operadór sira atu kumpre iha territóriu tomak.

Iha novembru  2019, autoridade nasionál ne’e halo lansamentu ba Mobile Service Registration System (MSRS) hanesan sistema ba rejistu telemóvel pre-pagu  ho objetivu katak ba servisu operadór ba rejistu sim cart  ba kliente nune’e aleinde dadus sira tama iha sistema operadór sira, ba mós direita ba ANC nia sistema.

Nune’e mós, lansa prosesu rejistrasaun Internet Service Provider (ISP) iha Timor-Leste ba dahuluk.

“Espera iha tinan ne’e, lisensiamentu ba ISP tenki bele sai ona hodi bele halo operasaun hanesan mós ISP seluk,” João Olívio subliña.

Halo mós lansamentu no konsultasaun públiku ba esbosu lei ba protesaun konsumidór ba servisu telekomunikasaun nian ne’ebé hanaran consumer complain no consumer disputes.

“Esbosu regulamentu ne’e rasik hetan ona aprovasaun no atu haree oinsá trata reklamasaun  no desputa husi konsumidór sira hasoru operadór. Ida-ne’e atu fó dalan atu ita bo’ot bainhira halo reklamasaun ruma hasoru servisu husi operadór ida, presiza tuir regulamentu ne’ebé estabelese ona,” nia esplika.

Daudaun ne’e, parte ANC elabora hela esbosu lei ba espektrum rádiu frekuénsia nian no husi esbosu lei ne’e rasik parte autoridade foin kobre de’it banda telemóvel.

“Hanesan televizaun no rádiu, ezemplu RTTL, STL no Rádiu Rakambia seidauk define regulamentu, nune’e bainhira uza tenke selu no iha tempu badak konsultasaun ne’e sei ramata”, nia informa

Iha esbosu ne’e haktuir, ba televizaun sira ne’ebé  maka uza rádiu frekuénsia iha obrigasaun atu kontribui ba taxa espektrum rádiu frekuénsia nian.

Iha relatóriu annuál ANC hatudu katak iha tinan 2019 konsege kobre reseita millaun $1,4 husi operadór Timor Telecom, Telkomcel no Telemor.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here