Vice Ministru Administrasaun Estatal, Lino de Jesus Torezao. Imajen/Antonia Maia Gusmao

DILI, 07 jullu 2020 (TATOLI)–Vise-Ministru Administrasaun Estatál (MAE), Lino de Jesus Terrezão, hateten subsídiu ba ekipa saneamentu la justu tanba ekipa sira-ne’e hetan de’it $5 kada loron ida.

Notísia Relevante: Ekipa Saneamentu Na’in-340 Sei Hetan Subsídiu Ba COVID-19

“Ha’u akompaña informasaun hosi mídia katak ekipa saneamentu sira ne’ebé mak hamoos iha dalan no valeta ne’e hetan $5. Konforme ha’u rona maibé atu selu ka la selu, ha’u sente ida-ne’e hanesan diskriminasaun boot ida tanba subsídiu ba ekipa saneamentu la justu,” Vise-Ministru Administrasaun Estatál (MAE), Lino de Jesus Terrezão, iforma ba jornalista sira iha Palásiu Governu, tersa ne’e. 

Nia hatutan, kestaun ne’e presiza haree didi’ak no oinsá mak bele propoin fila-fali ba Konsellu Ministru para nune’e bele selu ho justu, tanba ida-ne’e kria injustisa boot ida ba sira.

“Dia’k liu ita aprezenta ba Konsellu Ministru para atu haree kestaun ne’e ho didi’ak tanba ita iha ona ekipa rekooperasaun ne’ebé mak halo levantamentu ba dadus nian hodi oinsa mak sira bele hetan hotu. Tanba foin dadauk ne’e, ha’u ho ministru halo enkontru ida ho ekipa rekooperasaun ekonómika nian ne’ebé mak lidera hosi Rui Gomes,” nia hateten. 

Nia haktuir, Xefe Ekipa Téknika Responsável ba elaborasaun planu Rekoperasaun Ekonómika Pós-COVID-19, Rui Augusto Gomes, hateten osan ne’e ema hotu hetan hanesan no osan ne’e destinadu ona mai COVID-19 nian.

“Bainhita ita temi rekooperasaun ekonómia katak rua ne’e iha hotu laran. Tanba ne’e rekoopera situsaun ne’ebé mak la favorese ba sira atu tama fali iha rekoopersaun ekonómia nia laran hodi nune’e mak ita bele responde sira-nia nesesidade no ejizensia,” nia dehan.

Notísia Relevante: Konsellu Jestaun Fundu Esforsu Rezolve Subsídiu Ba Ekipa Saneamentu

Jornalista : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here