Komandante PNTL Munisípiu Dili, Superintendente Xefe Hendrique da Costa, hamutuk ho nia estrutura hasoru malu ho Bispu Dioseze Dili, Mgr. Virgílio do Carmo da Silva, SDB, tersa (07/07/2020). Imajen/Eugénio Pereira

DILI, 07 jullu 2020 (TATOLI)- Komandante Polísia Nasional Timor-Leste (PNTL) Munisípiu Dili, Superintendente Xefe Hendrique da Costa, hamutuk ho nia ierarkia sira, ohin, ba hasoru malu ho Bispu Dioseze Dili, Mgr. Virgílio do Carmo da Silva, SDB, hodi aprezenta-aan no husu uma kreda nia apoiu ba programa hametin paz  iha Dili nu’udar kapitál nasaun Timor-Leste.

Notísia Relevante : Komandu Polísia Dili Halo Konsultasaun Ba Programa Hametin Paz 

 “Igreja agradese inisiativa Komandante Polísia Munisípiu Dili ho nia estrutura hakat mai dioseze Dili atu aprezenta nia aan no husu uma kreda atu kaer liman hamutuk servisu ba paz iha Dili laran no ba Timor-Leste,”  hateten Bispu Dioseze Dili, Mgr. Virgílio do Carmo da Silva, SDB ba jornalista sira, ohin, hafoin enkontru ho estrutura Komandu Munisípiu Dili iha Kamara Dioseze Dili.

Don Virgílio hateten, inisiativa Komandante Dili hodi aprezenta aan ba Igreja hodi koopera ho Igreja, sosiedade sivíl, autoridade suku sira nu’udar pasu importante tebes atu kontribui ba dezenvolvimentu Timor-Leste.

Kona-ba kazu baku rahun estátua Nai Feto iha Grupu Ave Maria Igreja Parókia Becora nian, Bispu Dioseze Dili  ne’e dehan, mezmu kazu ne’e PNTL investiga hela, maibé Dioseze Dili hamutuk ho sarani Igreja Becora halo ona misa agradesimentu monu ain ba Nai Feto.

Iha fatin hanesan Superintendente Xefe, Hendrique da Costa, deklara nia parte halo primeiru reuniaun ho Bispu Dioseze Dili Don Virgílio do Carmo da Silva, SDB,  ho objetivu kumprimenta no hato’o nia vizaun no misaun durante nia mandatu hodi koopera ho entidade hotu atu lori paz no hakmatek ba komunidade iha Dili laran.

Nu’udar komandante polísia Dili, Superintendente Xefe Hendriqur da costa, hakarak kria kooperasaun ho entidade hotu- hotu atu oinsá bele lori Dili sai hosi konflitu hodi garante paz ba no dezenvolvimentu.

Tuir planu, Komandante ne’e sei hala’o mós enkontru ho lider Musulmanu, Budista, organizasaun  la’ós governu nian, autoridade suku no grupu juventude sira hodi ko’alia kona-ba misaun dame iha Dili.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here