Atividade traballadór iha projetu estrada Manduki, Atabae. Imajen Tatoli/António Gonçalves

DILI, 07 jullu 2020 (TATOLI) – Iha loron 20 novembru 2019, Primeiru-Ministru, Taur Matan Ruak, aprezenta ona projetu Dekretu-Lei, ne’ebé Konsellu Ministru aprova ona kona-ba alterasaun daneen ba Dekretu-Lei númeru 10/2005, loron 21 novembru kona-ba Rejime Jurídiku Aprovizionamentu nian. 

Iha alterasaun ne’e mensiona atu garante katak publisitasaun anúnsiu konkursu públiku internasionál sira sei la’ós obrigatória atu publika iha jornál impresu sira ho sirkulasaun internasionál de’it maibé ezije publisitasaun pelumenus iha plataforma eletrónika rua ne’ebé utiliza internasionalmente ba efeitu no mós iha jornál ida-ne’ebé sirkula iha nasaun laran.

Haree ba nível kobertura mídia nasionál nian ladún to’o ba rai-li’ur, maka Governu hahú publika iha jornál estranjeiru atu ema bele asesu hodi halo submisaun ba konkursu.

Notísia Relevante: CNA Bele Publika Konkursu Públiku Iha Mídia Estadu Duké Jornál Internasionál

Ministériu Obra Públika (MOP) liuhosi Diresaun Nasionál Aprovizionamentu (DNA) publika ona konkursu públiku liuhosi website www.dgmarket.com ne’ebé internasionalmente akreditadu hodi publika avizu konkursu publiku sira iha mundu. 

Tuir nota ne’ebé Agência Tatoli asesu, konkursu ne’ebé MOP hahú publika iha mídia online ne’e mak hanesan estudu ba polo dezenvolvimentu iha Baucau no Batugade ne’ebé ho kustu estimasaun $300.000, ne’ebé publika iha 6 jullu 2020 no loron terminasaun admisaun ba konkursu ne’e iha loron 11 agostu 2020.

Nune’e mós, konkursu públiku ba servisu manutensaun jeradór, servisu limpeza iha edifísiu Ministériu Finansa iha munisípiu, provizaun independente ba servisu auditoria esternál iha Ministériu Finansa, reparasaun no manutensaun ba resfriadór iha edifísiu sentrál Ministériu Finansa, konsultora ba preparasaun dezeñu detalladu ba estrada urbana Dili no seluk tán.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here