Vice Ministru Administrasaun Estatal, Lino de Jesus Torezao. Imajen/Antonia Maia Gusmao

DILI, 07 jullu 2020 (TATOLI)–Vise-Ministru Administrasaun Estatál (MAE), Lino de Jesus Terrezão, ohin, hala’o enkontru ho Primeiru-Ministru, Taur Matan Ruak, hodi ko’alia kona-ba polítika rekoperasaun ekonómika iha situasaun COVID-19 no kooperasaun levantamentu dadus hafoin estende Estadu Emerjénsia ba daruak nian.

Notísia Relevante: Rui Gomes Simu Orientasaun Husi PM Hodi Organiza Ekipa Rekuperasaun Ekonómika

“Iha enkontru ne’e, ami ko’alia kona-ba rekoperasaun ekonómika iha situasuan COVID-19 nia laran no oinsá bele forma ekipa ida ba kooperasaun nian atu halo levantamentu dadus, Nune’e, bele mai hato’o fali ba Primeiru-Ministru atu haree fila fali, ba situasaun agora dadaun ne’e hafoin Estadu Emerjensia estende to’o dala-rua,” dehan Vise-Ministru Administrasaun Estatál (MAE), Lino de Jesus Terrezão, ba jornalista sira iha Palásiu Governu, Dili, tersa ne’e.

Aleinde ne’e, nia hatutan, iha enkontru ne’e ko’alia mós kona-ba desentralizasaun katak atu entrega kompeténsia poder lokál ba iha munisípiu 12 inklui Rejiaun Administrativa Espesiál Oé-Cusse Ambeno (RAEOA). Maibé, nia dehan, RAEOA labele ko’alia tanba RAEOA iha nia estatutu rasik hodi bele rezolve nia problema.

Pontu importante seluk ne’ebé hato’o ba Primeiru-Ministru, nia dehan, mak atu haree fila-fali Orsamentu Jerál Estadu (OJE) 2020-2021, tanba agora daudaun ne’e uza de’it orsamentu duodésimu hodi atende ba situsaun COVID-19 ne’ebé mak ho montante hamutuk $140-resin.

“Lori osan ne’e hodi atende ba situasaun COVID-19, hodi halo fiskalizasaun no monitorizasaun ida ne’ebé di’ak iha munisípiu 12 ne’ebé hala’o hotu ona no agora tama fali ba REOA nian. Parese, RAEOA ha’u rasik mak sei ba hodi halo monitoriza ba prosesu pagamentu ba família kbiit laek sira,” nia hateten.

Ba Primeiru-Ministru, nia hato’o mós kona-ba desentralizasaun administrativa nian tanba lei ne’ebé mak aprezenta ona ba iha Parlamentu Nasionál (PN), maibé Prezidente Repúblika mak seidauk promulga.

“Ho ida ne’e, ohin, ha’u hato’o ona ba señór Primeiru-Minsitru katak bainhira ita hala’o desentralizasaun administrativa ita presiza lei poder lokál ne’ebé mak aprezenta tiha ona iha Parlamentu Nasionál maibé prezidente seidauk promulga. Signifika lei ne’e kaduka, entaun presiza haree no prevee fila-fali hodi hatama ba Parlamentu Nasionál hodi prosesu,” Vise-Ministru ne’e hateten.

Nia hateten, iha mandatu tinan rua-resin ne’e, MAE sei atinji programa prioridade sira hanesan desentralizasaun iha munisípiu sira hotu maibé presiza prestasaun servisu maka’as ba konsentrasaun lei poder lokál ne’e mak esensial.

Bianhira lei ne’e iha ona, nia dehan, maka buat hotu la’o di’ak tanba lei ne’e mak orienta Governu atu hala’o desentralizasaun iha munisípiu sira hotu.

Jornalsita : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here