Arsebispu Arkedioseze Metropolitana Dili, Don Virgílio do Carmo da Silva, SDB. Imajen/ Egas Cristóvão

DILI, 07 jullu 2020 (TATOLI)-Arsebispu Arkidioseze Metropolitana Dili, Mgr. Virgílio do Carmo da Silva, SDB,  deklara katak Igreja Katólika too agora seidauk hasai deklarasaun ofisiál ruma hodi hasoru rituál juramentu partidu KHUNTO nian.

Bispu Virgílio rekoñese, Padre Parókia Becora, Amu Domingos Maubere hasai duni deklarasaun ida hodi kontra serimónia rituál juramentu ne’ebé Konselleiru Masimu Partidu KHUNTO, José “Naimori” Bucar hala’o, maibé deklarasaun ne’e indivíduu no seidauk reprezenta Igreja Katólika.

“Uma kreda ofisiálmente ami seidauk hasai buat ida hodi kondena aktu ruma ne’ebé bou Naimori Bucar halo, tanba uma kreda em-nome da konferénsia episkopál seidauk hasai deklarasaun ruma hodi kondena ka buat ruma laloos, ne’e duni uma kreda nakloke atu bele ko’alia ho entidade hotu no uma kreda hakuak nafatin ema hotu nu’udar sarani buka dalan hodi ko’alia ba malu hodi buka ita nia dezentendimentu sira ne’e iha ne’ebé hodi rezolve ho dalan di’ak,” hateten  Don Virgílio, ohin,  ba jornalista iha Kamara Dioseze Dili.

Bispu Virgílio hatutan, iha nasaun demokrasia ne’e ema hotu-hotu livre atu hato’o sira nia espresaun inklui padre sira, maibé espresaun ne’e bele konsidera legál, bainhira Bispu Dioseze tolu, Dili, Baucau no Maliana halo ona enkontru jerál maka foin iha baze legál hodi Prezidente Konferénsia Episkopál Timorense nu’udar mós Bispu Dioseze Maliana, Mgr. Noberto Amaral mak bele ko’alia reprezenta Igreja.

“Ema idak-idak bele hasai nia deklarasaun, maibé atu hasai deklarasaun ruma tenke mai husi bispu sira. Ita labele ba kaer ema ida nia hanoin dehan ne’e reprezenta ona uma kreda ne’e, lae. Indivíduu ruma hosi uma kreda ko’alia ne’e pesoál, tanba uma kreda seidauk ko’alia buat ruma,” Don Virgílio tenik.

Bispu Virgílio do Carmo da Silva hatutan, Igreja Katólika mós prontu koopera ho partidu polítiku sira liu-liu lideransa Partidu KHUNTO hodi tuur hamutuk hodi hakotu problema dezentendimentu ne’ebé mosu.

Nia hatutan, too agora nia rasik mós seidauk simu kontaktu ruma hosi lideransa partidu KHUNTO hodi buka solusaun oinsá halo diálogu rezolve fukun ba problema sira ne’ebé mosu hodi sosiedade sira kontribui ba dame.

Too notísia ne’e publika, Agênsia Tatoli buka konfirma asuntu ne’e ba konselleiru másimu partidu KHUNTU José “Naimori” Bucar, maibé seidauk hetan konfirmasaun.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here