Ministra Negósiu Estranjeiru no Kooperasaun (MNEK), Adalgiza Albertina Xavier Reis Magno. Imajen/Egas Cristovão

DILI, 07 jullu 2020 (TATOLI)-Governu liuhusi Ministériu Negósiu Estranjeiru no Kooperasaun (MNEK), Ministériu Saúde ho Ministériu Interiór, tersa ne’e halo ona diskusaun  atu kria mekanismu no regulamentu atu simu Timor-oan no ema estranjeiru ne’ebé maka daudaun ne’e hakarak fila mai Timor-Leste iha ámbitu prevensaun no propagasaun COVID-19.

“Ami sei diskute atu haree ba kapasidade ita-nian ema na’in hira mak atu tama mai Timor loron ida, ema na’in hira mak ita iha kapasidade atu tau iha kuarentena, oinsá ita iha forsa atu kontrola movimentu hirak ne’e,” informa Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, iha Edifísiu MNEK Praia dos Coqeiros, Dili, ohin.

Mundu seidauk livre husi pandemia globál COVID-19, tanba ne’e Governu sei esforsu atu identifika no halo kontrolu ba sidadaun tantu Timor-oan no Estranjeiru ne’ebé maihosi liña mean coronavirus hodi halo prevensaun.

 “Haree husi koordenasaun Ministériu tolu ne’e, ohin ami diskute hela medida Estadu Emerjénsia ramata ona ita tenke regula oinsá para labele halo diskriminasaun ba ema ida,” dehan Nia.

“Ita tenke foti nafatin medida atu prevene nafatin COVID-19 iha ita-nia nasaun, maibé kuandu Estadu Emerjénsia ramata ita-nia maluk Timoroan sira ne’ebé hakarak fila mai ita tenke fasilita,” katak Adaljiza.

Notísia Relevante :Governu Sei Aluga Aviaun Tula Traballadór Timoroan iha Korea Súl

Maneira ne’ebé maka MNEK sei implementa mak koordena ho Ministériu relevante hanesan Ministériu Saúde, Ministériu Interiór hodi kria regulamentu atu regula ema Estranjeiru no Timoroan ne’ebé maka hakarak Tama territóriu Timor-Leste.

Entretantu, Governu liuhosi Sekretáriu Estadu Formasaun Profesionál no Empregu (SEFOPE) prevee ona osan hamutuk $ 94.000 hodi lori fila traballadór Timoroan ne’ebé maka durante ne’e servisu iha Korea Súl no Austrália, maibé vistu mate ona ona.

Tuir dadus husi SEFOPE traballadór  Timoroan na’in 86-resin maka daudaun ne’e vistu mate ona no iha posibilidade sei aumenta.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here