Diretora Jeral Prestasaun Saude Ministeriu Saude, Odete Viegas da Silva, akompana ekipa MS. Imajen/Felicidade Ximenes

DILI, 06 jullu 2020 (TATOLI)–Diretora Jerál Prestasaun Saúde, Odete Viegas da Silva, hateten ema na’in-21 maka tama Timor-Leste (TL) ho dalan ilegalmente hafoin implementasaun Estadu Emerjénsia liga ho surtu COVID-19.

Nia dehan durante semana ida nia laran, ema na’in-70 maka tama Timor-Leste liuhosi Aeroportu, Portu no Fronteira Terrestre. Husi númeru ne’e ema na’in-27 tama auto-kuarentena no na’in-43 iha kuarentena obrigatóriu ne’ebé maka Governu prepara ona iha Dili no Munisípiu sira.

”Husi númeru ne’ebé mak tama legál no mós númeru sira ne’ebé tama ilegalmente hamutuk 21, husi 21 ne’e na’in-10 tama husi Memo, na’in neen tama husi Batugade, na’in ida tama husi Cova no na’in tolu tama husi Tunubibi, Munisípiu Bobonaro, entaun númeru sira ne’e iha ema ida estranjeiru mak tama husi Lifau Oé-Cusse no parte Imigrasaun deporta fila,” informa Odete Viegas da Sila, durante konferénsia imprensa iha Caicoli, ohin.

Daudaun ne’e, Governu liuhosi Ministériu Saúde kontinua prepara no kria kondisaun ba fatin kuarentena sira hodi koloka abitante timoroan no estranjeiru bainhira tama territóriu Timor-Leste.

Ministériu Saúde iha pilár importante atu kontrola, prevene, halo inspesaun ba fatin kuarentena sira hodi prevene no halo propagasaun ba moras pandemia globál ne’e.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here