Xefe Bankada CNRT, Duarte Nunes. Imajen/Egas Cristovão

DILI, 07 jullu 2020 (TATOLI)—Xefe Bankada Congresso Nacional da Reconstrução de Timor (CNRT), Deputadu Duarte Nunes, hateten Projetu Lei Antí Corrupção (LAC) ne’ebé oras ne’e diskute no aprova kada artigu, bainhira sai ba Lei ema hotu tenke hakru’uk tanba lei ne’e ba interese komún.

Notísia Relevante: LAC Konvida Sosiedade Tomak atu Partisipa iha Medida Prevensaun

Xefe Bankada Congresso Nacional da Reconstrução de Timor (CNRT), Deputadu Duarte Nunes, hateten parte bankada CNRT ne’ebé envolve iha diskusaun Lei Antí Corrupção mak Deputada Carmelita Caetano Moniz.

Xefe Bankada CNRT ne’e konsidera LAC ne’e bele ajuda situasaun ne’ebé lei anteriór sira seidauk akomoda entaun bele ajuda halo investigasaun di’ak liután.

“Tanba se ita hotu konkorda signifika ke ita ida-ne’e sai lei di’ak ba nasaun ne’e. Ita espera katak akomodativu tanba interese hotu la’ós interese deputadu sira-nian maibé konvida organizasaun relevante sira fó sira-nia opiniaun, kuandu  projetu LAC sai ba lei ita hotu hakru’uk,” Xefe Bankada CNRT, Duarte Nunes, informa ba jornalista sira iha resintu Parlamentu Nasionál, tersa ne’e.

Maibé Xefe Bankada CNRT ne’e afirma, bainhira halo aprovasaun iha faze iha Espesialidade deputadu sira hosi Komisaun A sei briefing kada bankada parlamentár sira maibé desizaun nafatin iha plenária.

“Iha artigu ruma ke sira uza maioria ami rekorre ba tribunál,” hateten Deputadu Duarte Nunus.

Tanba, tuir nia, diskuaun ne’ebé la’o iha Manufahi no oras ne’e iha ona Aileu ne’e iha nível Komisaun A nian, entaun sei lori ba plenária iha tempu oin mai.

Notísia Relevante: LAC Artigu 28, Obriga Sidadaun ho Kargu Públiku Tenke Deklara Rikusoin

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here