Xefe Bankada CNRT, Duarte Nunes. Imajen Tatoli/Egas Cristóvão

DILI, 07 jullu 2020 (TATOLI)—Xefe Bankada CNRT, Deputadu Duarte Nunes, hateten ajente Polísia Nasionál Timor-Leste (PNTL) labele envolve iha partidu polítiku tanba konstituisaun la fó dalan.

Notísia Relevante: Komandu PNTL Simu Ona Lista Kona-ba Komandante Balun “Juramentu” Ba GAM

Xefe Bankada CNRT ko’alia kestaun ne’e ligadu ba ajente Polísia Nasionál Timor-Leste (PNTL) balun ne’ebé envolve juramentu ba partidu polítiku balun.

“Iha parte ida ke ha’u bele konkorda katak ema ne’e iha direitu vota ba partidu ida. Maibé bainhira ba vota, enkuantu nia hanesan polísia, nia labele tama partidu. Ne’e  konstituisaun artigu 47 la fó dalan atu membru polísia ida tama iha partidu. Se situasaun ne’e akontese duni entaun investiga no hasai membru ne’e. Hili partidu ka hili forsa,” Duarte Nunes informa ba jornalista sira, iha resintu Parlamentu Nasionál, tersa ne’e.

Xefe Bankada CNRT ne’e apoia Komandante PNTL, Komisáriu Faustino da Costa, atu investiga hodi hola medida tuir lei ne’ebé iha.

“Tanba agora ne’e KHUNTO nia ema mak Vise-Ministru Interiór maibé Komandante PNTL nia level ne’e hanesan ministru. Tanba, desizaun iha level ministru ne’e polítiku no polítiku labele tama iha forsa, bele ba ajuda hadi’a. Maibé se mak deside ne’e, Komandante PNTL mak hola desizaun,” nia dehan.

Nia hatetetn, se Komandante PNTL fó-sai katak membru polísia balun halo juramentu entaun rezutadu investigasaun tenke fó-sai ba públiku. Tanba, nia dehan, polísia ne’e ita labele partidariza.

“Se hatene nia atu tama CNRT, FRETILIN ka KHUNTO tenke hasai tiha nia. Kuandu aban bainrua iha prova tenke hasai tiha, tanba nasaun ne’e tenke la’o ba-oin,”  Xefe Bankada CNRT ne’e hateten.

Hatán ba kestaun ne’e, Deputadu Bankada KHUNTO, Luis Roberto, rejeita informasaun ne’ebé dehan ajente polísia balun halo juramentu ba Partidu KHUNTO.

“Ida-ne’e informasaun ne’ebé la loos. Ne’ebé, ita-boot sira labele interpreta buat seluk tán. Ami rejeita informasaun ne’e,” Deputadu Luis Roberto hateten.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here