Vise Primeiru-Ministru no Ministru Planu no Ordenamentu, José Maria dos Reis. Imajen/Espesiál

DILI, 06 jullu 2020 (TATOLI) – Vise Primeiru-Ministru no Ministru Planu no Ordenamentu, José Maria dos Reis, iha segunda ne’e hala’o enkontru informál ho Primeiru-Ministru (PM), Taur Matan Ruak, hodi haree ba preparasaun orgánika ministériu.

“Ha’u mai informa de’it situasaun balun ba preparasaun ha’u nian, iha Ministériu Planu no Ordenamentu (MPO). Preparasaun sira ne’e mak hanesan kona-ba órganika ministériu nian hodi aselera no lori ba Konsellu Ministru no hetan aprovasaun,” relata Vise PM, José Maria dos Reis hafoin remata enkontru ho PM Taur iha Palásiu Governu, segunda ne’e.

Notísia Relevante: Governu Halo Mudansa ba Orgánika VIII Governu, Sei Iha Vise-PM Na’in-Rua

Governante ne’e subliña, tempu ba preparasaun orgánika ne’e loron 60 nia-laran, maibé Xefe Governu dehan se bele aselera lalais di’ak liután.

Tuir José Reis, enkontru ohin ho PM hanesan enkontru rutina ne’ebé nia sempre halo.

“Enkontru ne’e hanesan rutina, husi Primeiru-Ministru no Vise Primeiru-Ministru na’in-rua hotu, ba ha’u rasik iha segunda no kuarta kada semana,” nia akresenta.

Relasiona ho esbosu dekretu-lei tolu kona-ba planu ordenamentu territóriu ne’ebé mak MPO simu ona husi Ministériu Obra Públika (MOP), Ministru ne’e haktuir esbosu ne’e entrega ona ba parte legál sira hodi, nune’e iha semana-rua tán bele lori ona ba Konsellu Ministru hodi haree no hetan aprovasaun.

Iha loron 13 maiu, Konsellu Ministru aprova Projetu Dekretu-Lei ba alterasaun dahuluk Dekretu-Lei númeru 14/2018 17 agostu, kona-ba Orgánika VIII Governu Konstitusionál.

Liuhosi diploma ne’e, eziste Vise-PM na’in-rua hodi fó apoiu ba Xefe Governu iha ninia knaar.

Ministériu Planeamentu no Investimentu Estratéjiku troka ba Ministériu Planu no Ordenamentu, ne’ebé hetan responsabilidade ba atribuisaun governamentál iha matéria planeamentu no ordenamentu territoriál no Ministériu Obra públika sei prosege atribuisaun sira hotu kona-ba matéria planeamentu urbanu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here