Ativista no estudante Timoroan balun halo deklarasaun hodi fó solidariedade ba povu Papua. Imajen/Foti hosi Google

DILI, 06 jullu 2020 (TATOLI)-Tribunál Distritál Dili (TDD) liuhosi Juiz prosesu Ivan Suritai, husu prokuradór  titular Claudino Ximenes atu halo re-kualifikasaun jurídika ba krime dezobediénsia ne’ebé komete hosi manifestante ‘’free West Papua’’ na’in-14, ne’ebé  foin lalais, hala’o manifestasaun  hasoru Governu Indonézia através  Embaixada Repúblika Indonézia nian iha Dili.

Notísia Relevante : Manifestante “Free West Papua” Submete ba Julgamentu Primeiru Interrogatóriu

Tuir loloos iha audiénsia  julgamentu, ohin, Tribunál halo leitura desizaun, maibé  ho akuzasaun  ne’ebé antes ne’e parte Ministériu Públiku (MP) imputa ba arguidu sira ho krime dezobediénsia de’it no la temi ninia klasifikasaun, tanba ne’e ho entendimentu Tribunál nian husu MP atu halo re-kualifikasaun jurídika hodi define loloos hafoin omóloga.

Tuir artigu 244 krime dezobediénsia iha kódigu penal Timor-Leste  esplika kona-ba kualifikasaun ba krime iha tolu hanesan;

Iha númeru 1). Ema ne’ebé la halo tuir nafatin orden ka mandatu lejítimu komunikadu regularmente, ne’ebé autoridade ka funsionáriu kompetente maka  fó sei hetan pena prizaun to’o tinan-tolu (3) ka multa:

Alínea a. kuandu dispozisaun legal determina; ka

  1. kuandu autoridade ka funsionáriu ne’e fó hatene ba ajente katak, nia la halo tuir orden ka mandatu ne’e karik, nia sei hetan responsabilidade kriminál.

2). Iha situasaun ne’ebé dispozisaun legal kualifika faktu ida hanesan dezobediénsia kualifikada sei aplika pena prizaun tinan-ida (1) to’o tinan-haat (4).

 3). Dezobediénsia hasoru proibisaun konkreta ka interdisaun ne’ebé sentensa kriminál determina no mós dezobediénsia hasoru pena asesória ka medida ba seguransa ne’ebé la halakon Liberdade sei fó fatin ba pena referida iha númeru 1. Nune’e,  na’in ba asaun penal MP  konfirma ba Tribunál katak MP mantén ninia akuzasaun ba krime dezobediénsia iha artigu 244 númeru 1 alínea a.

Hafoin rona tiha konfirmasaun MP nian, Tribunál deside adia hikas julgamentu ne’e ba iha loron 8 jullu, tinan ne’e, tuku 11:00 Otl, hodi rona desizaun final.

Kazu ne’e envolve hosi manifestante nain-14 ho inisiál  CDJ, NN, MM, ADC, JRM, OSQ, DDC, MM, CL, MA, DXADC, MSM, MPS no AM.

MP akuza arguidu sira ho krime dezobediénsia tanba iha loron 15 juñu 2020, sira-nia parte  halo protestu no uza pamfletu hasoru Estadu Repúblika Indonézia (RI) hodi hatudu sira nia solidariedade ba povu Papua ne’ebé sira konsidera estadu Indonézia viola povu Papua nia direitu no liberdade.

Audiénsia julgamentu ba arguidu sira ne’e hetan asisténsia legal hosi Defensor Públiku João Carvalho.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here