Xefe Departementu Sentru Matan Nasionál, Belmerio Jerónimo.Imajen/Felicidade Ximenes.

DILI, 06 jullu 2020 (TATOLI)-Sentru Matan Nasionál oras ne’e hala’o fila-fali operasaun  ba pasiente ho problema matan hafoin paradu ona durante implementasaun Estadu Emerjénsia fulan tolu hahú marsu to’o juñu 2020.

Xefe Departementu Sentru Matan Nasionál, Belmerio Jerónimo, husu ba pasiente matan sira ne’ebé maka durante implementasaun Estadu Emerjénsia la konsege halo operasaun ba matan atu bele halo tratamentu agora tanba sentru ne’e funsiona hanesan baibain.

Notísia Relevante :2019, Pasiente Konsulta Matan Iha SMN Hamutuk Rihun 18-resin

”Kona-ba ai-moruk matan opera nian sei sufisiente hela tanba ne’e e mak husu ba pasiente sira hahú hakbesik an mai hodi halo operasaun ba matan,”dehan nia ba jornalista sira iha ninia servisu fatin Bidau, segunda ne’e.

Aleinde iha Nasionál, SMN mós sei re-ativa programa tratamentu no operasaun ba pasiente matan sira iha Munisípiu tanba paradu ona durante fulan tolu-resin.

Nia esplika durante implementasaun EE, pasiente ho problema matan menus husi ema na’in 10 maka halo konsulta matan no fulan ida la to’o ema na’in 200 kompara ho loron baibain sira antes mosu COVID-19 kada loron ema na’in 80 to’o 100-resin.

Durante fulan-tolu EE nian, Xefe Departementu ne’e esplika totál pasiente hamutuk 400-resin maka halo tratamentu matan iha fatin ne’ebá.

”Durante Estadu Emerjénsia ne’e ami Sentru Matan deside la halo operasaun tanba pasiente mós mai menus no doutór sira mós deside katak COVID-19 ne’e perigu entau ami la halo operasaun,”dehan nia.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here