Prezidente Partidu Demokrátiku (PD), Mariano Assanami Sabino. Imajen/António Gonçalves.

DILI, 6 jullu 2020 (TATOLI)—Bankada Partidu Demokrátiku (PD) husu progresu polítika desentralizasaun ne’ebé prevee iha Planu Estratéjiku Dezenvolvimentu Nasionál (PEDN) tanba to’o oras ne’e la la’o.

Notísia Relevante: Tinan 2020, Governu Hakarak Hakle’an Prosesu Desentralizasaun Administrativa

Deputadu Partidu Demokrátiku (PD), Mariano Sabino “Assanami”, hateten Orsamentu Jerál Estadu (OJE) mai ne’e, tenke haree ona dezenvolvimentu suku no mós polítika desentralizasaun. 

Orsamentu Jerál Estadu (OJE) mai ne’e, ita tenke haree ona dezenvolvimentu suku ne’e tenke dezenvolve di’ak ona iha kraik no husu mós polítika desentralizasaun ne’e to’o iha ne’ebé. Ita tenke haree ida-ne’e,” Deputadu PD, Mariano Sabino “Assanami”, akresenta liuhosi plenária, Parlamentu Nasionál, segunda ne’e.

Assanami ko’alia asuntu ne’e tanba governasaun anteriór prioritiza polítika desentralizasaun ne’e maibé to’o oras ne’e la la’o.

Nia dehan, Governu antes ne’e prioritiza polítika ne’e tanba Konstituisaun RDTL artigu 5 (Desentralizasaun) alínea 1 hateten, Estadu respeita, iha nia organizasaun rai-laran nian, kona-ba prinsípiu atu fahe kbiit Administrasaun Públika nian.

Iha alínea 2 hosi artigu ne’e esplika,  Lei-oan maka hatuur no hametin karaterístika eskalaun oin-oin rai-laran nian no mós kompeténsia administrativu órgaun sira-ne’e nian, no alínea 3 fundamenta Oé-Cusse-Ambeno no Atauro, sira hetan tratamentu administrativu no ekonómiku espesiál.

Entretantu, Bankada Congresso Nacional da Reconstrução de Timor (CNRT) liuhosi Deputadu Arão Noé de Jesus da Costa Amaral, dehan presiza baze legál hodi regulariza polítika desentralizasaun ne’e.

“Ita seidauk aprova projetu lei podér lokál, ha’u hanoin polítika ne’e mós sei la la’o di’ak. Se ita halo de’it ho dekretu Governu la la’o tanba mandatu konstitusionál tenke regulariza lei no mós lei ba eleisaun munisipál nian. Projetu lei ne’e iha ona Komisaun A nia meza. Ha’u hein katak Komisaun A bele konsidera prosesu ba projetu lei ida-ne’e para ita aselera, nune’e ita bele iha baze legál fó kompeténsia ba munisípiu sira reguladu tuir lei,” Eis Prezidente PN ne’e esplika liuhosi plenária, segunda ne’e.

Hatán ba preokupasaun hirak ne’e, Prezidente Komisaun A, Deputadu Joaquim dos Santos, hateten antes ne’e fó-sai ona  katak lei podér lokál ne’e tama ona ajenda Komisaun A nian maibé Komisaun A sei haree uluk Lei Antí Corrupção (LAC) ne’ebé daudaun ne’e halo hela diskusaun ba artigu ida ba artigu seluk. 

Notísia Relevante: Governu Hahú Estabelese Estrutura Munisipál Hodi Dudu Prosesu Desentralizasaun

Jornalista : Evaristo Soares Martins

Editór       :  Cancio Xiemens

HAKEREK NO HATÁN

Please enter your comment!
Please enter your name here