Ministru Asuntu Parlamentár no Komunikasaun Sosiál, Francisco Martins da Costa Jerónimo. Imajen Tatoli/Egas Cristovão

DILI, 06 jullu 2020 (TATOLI) – Ministru Asuntu Parlamentár no Komunikasaun Sosiál, Francisco Martins da Costa Jerónimo hala’o reuniaun regulár ho Primeiru-Ministru (PM), Taur Matan Ruak hodi relata servisu Ministériu Asuntu Parlamentár no Komunikasaun Sosiál (MAPKOMS).

“Reuniaun ne’e atu relata saida maka MAPKOMS halo ho Parlamentu tanba presiza informa ba Primeiru-Ministru. Ha’u reprezenta Governu tomak iha Parlamentu, entaun tenki fó nafatin informasaun ba Xefe Governu saida mak akontese no saida mak deputadu sira presiza ne’ebé iha relasaun ho Governu,” tenik Ministru Jerónimo iha Palásiu Governu, hafoin enkontru ho PM Taur, segunda ne’e.

Pontu importante ne’ebé governante ne’e informa tan ba PM maka asuntu ne’ebé iha relasaun ho Komunikasaun Sosiál.

“Foin lalais ha’u partisipa iha konferénsia Asosiasaun Jornalista Timor-Leste (AJTL) no ko’alia mós kona-ba Governu nia apoia ba jornalista sira nune’e mós mandatu Konsellu Imprensa nian ne’ebé ramata ona no presiza mandatu foun,” nia akresenta.

Iha enkontru ne’e, Ministru mós ko’alia kona-ba oinsá atu fó formasaun ba Mídia Ofisiál Governu sira iha ministériu hotu ho objetivu atu kapasita liután sira hodi transmite informasaun ministériu nian di’ak liu tán.

Nune’e mós, kona-ba atividade iha Parlamentu Nasionál ne’ebé nia parte sempre akompaña sesaun plenária iha segunda no tersa hodi rona preokupasaun reprezentante povu sira iha uma fukun no lei sira ne’ebé daudaun ne’e sei diskute.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here