Eis Komandante PNTL, Paulo de Fátima Martins. Imajen/thediliweekly.com

DILI, 06 jullu 2020 (TATOLI)- Eis Komandante Polísia Nasionál Timor-Leste (PNTL), Komisáriu Paulo de Fátima Martins, husu ba Primeiru-Ministru, Taur Matan Ruak, ho membru Governu sira kontinua servisu maka’as hodi garante paz no estabilidade nasionál.

Liuhosi enkontru ho PM Taur Matan Ruak, ohin, iha Palaçio do Governu, Paulo  Martins, nu’udar mós eis membru Parlamentu Nasional hosi Bankada CNRT husu ba Primeiru-Ministru ho membru Governu daualuk nian  atu halo esforsu hodi lori dezenvolvimentu ba rai ida-ne’e no kore povu hosi mukit no nakukun-laran.

Ba jornalista sira hafoin sorumutuk ne’e, Paulo Martins hateten, aproveita enkontru ne’e nia mós hato’o parabéns no kumprimenta Primeiru-Ministru  nu’udar belun di’ak husi tempu reziténsia too Timor-Leste restaura nia ukun rasik-aan.

“Dezde ha’u sai hosi polísia nunka hasoru Primeiru-Ministru, ohin, oportunidade di’ak ha’u mai hasoru hodi fó parabéns ba Primeiru-Ministru, saudades iha tempu uluk ami hasoru malu no husu Primeiru-Ministru servisu didi’ak ho membru Governu hodi tau matan ba povu no garante nafatin paz,”  hateten Paulo Martins.

Paulo Martins nu’udar primeiru komisáriu PNTL hahú husi Instituisaun PNTL harii iha tinan 2000 ho metamorfoze sira PNTL nian maka hanesan iha tinan 2000 to’o 2001 Instituisaun Estadu ida ne’e hanaran Timor Leste Police Services ka TLPS, nune’e hahú tinan 2001 to’o 2002 naran TLPS nakfilak ba East Timor Police Services ka ETPS.

Iha tinan 2002 Governu Timor-Leste liuhosi Eis Ministru Interior, Rogerio Tiago Fatima Lobato, muda ETPS ba  hanaran própriu  PNTL.

Ohin loron PNTL iha ona progresu barak, maske sei nafatin enfrenta dezafiu balun iha prosesu dezenvolvimentu instituisaun Estadu nian.

Hahú hosi tempu UNTAET to’o UNMISET, PNTL so uza regulamentu UNTAET No.: 22/2001 ne’ebé mai ho estrutura diviza lima (Ajente Rekruta/RA, Ajente, Senior Ajente, Sub Inspetór, Inspetór no Inspetór. Kona-ba diviza rua seluk maka Superintendente no Komisáriu so aplika ka fó ba lideransa ne’ebé lidera PNTL primeiru maka Paulo de Fatima Martins nomeadu ba Diretór Nasionál ne’ebé ikus mai hanaran fali Komandante Jerál PNTL ho diviza Superintendente ne’ebé remata nia mandatu iha tinan 2006.

Hafoin mandatu Komandante Jerál Paulo de Fatima Martins nian, Governu Timor-Leste liuhosi Eis Ministru Interior, Alcino Barris de Araujo, nomea Inspetór Afonso de Jesus, hodi kontinua lidera PNTL to’o loron 27 marsu 2009 hodi hetan nomeasaun foun no Polítiku ba Karu Segundu Komandante Jerál PNTL nu’udar komisáriu polísia.

Hosi 27 marsu 2009, IV Governu Konstitusionál nomea Longuinhos Monteiro, eis  Prokuradór Jerál Repúblika (PGR) nu’udar mós ema sivíl primeiru ne’ebé lidera Komandu PNTL.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here