Deputada CNRT, Carmelita Caetano Moniz. Imajen/espesiál

DILI, 06 jullu 2020 (TATOLI)—Bankada CNRT liuhosi Deputada Bankada CNRT, Deputada Carmelita Caetano Monis, hateten projetu SNC hetan vistu prévia hosi tribunal no husu ba Parlamentu Nasionál bele bolu Sistema Nasionál Kadastru (SNC-sigla portugés) mai iha plenária Parlamentu Nasionál no halo transmisaun direta para SNC halo esplikasaun detalladu kona-ba projetu SNC nian.

“Projetu SNC hetan ona auditoria hosi Kámara de Kontas maka hato’o mai parlamentu liuhosi Konta Jerál Estadu. Kámara de Kontas labele halo auditoria a mesma asuntu ba duas vezes tanba prinsípiu legalidade. Ha’u husu, karik Parlamentu Nasionál sei bele bolu SNC mai iha plenária, Parlamentu Nasionál no loke transmisaun direta para sira (SNC) halo esplikasaun detalladu kona-ba projetu SNC para povu hotu-hotu akompaña servisu ne’e nia benefísiu ba povu no estadu saida, nune’e labele akuza malu iha parlamentu de’it,” Deputada CNRT, Carmelita Caetanp Monis, ko’alia liuhosi plenária, Parlamentu Nasionál hodi hatan ba Bankada FRETILIN nia preokupasaun kona-ba Kámara Kontas liuhosi Tribunál Superiór Administrativu, Fiskál no Kontas (LOCdC-sigla portugés) atu halo auditoria ba projetu Sistema Nasionál Kadastru (SNC),  segunda ne’e.  

Projetu SCN ne’e, Carmelita hateten, iha tempu Primeiru-Ministru, Kay Rala Xanana Gusmão no Primeiru-Ministru Repúblika Portuguesa, Pedro Passos Coelho, hamutuk ho Ministru Justisa, Dionísio Babo, lansa projetu Sistema Nasionál Kadastru (SNK), loron 25 Jullu 2014 iha edifísiu SNC,  Kintál Boot, Díli.

Iha biban ne’eba, Ministru Justisa Dionísio Babo hateten implementasaun projetu SNC ne’e atu halo levantamentu ba rai hodi hatama dadus ba sistema modernu ho teknolójia foun. Timoroan sira ne’ebé tuir formasaun no integra iha projetu ne’e hamutuk na’in-150.

Projetu ne’e realiza tanba servisu hamutuk entre kompañia Grupo Média Nasionál (GMN) ho kompañia Holding Arm Apprize hosi Portugál nian hodi halo levantamentu kadastrais iha munisípiu sira.

Jornalista : Evaristo Soares Martins

Editór        :  Cancio Ximenes

HAKEREK NO HATÁN

Please enter your comment!
Please enter your name here