DILI, 06 jullu 2010 (TATOLI) – Primeiru-Ministru (PM), Taur Matan Ruak hamutuk ho membru Governu sira sei partisipa iha debate ho membru Parlamentu Nasionál (PN) relasiona ho atuasaun ezekutivu ba surtu COVID-19 iha Timor-Leste.
Maski iha loron 15 maiu, Sala Situasaun, Sentru Integradu Jestaun Krize (CIGC, sigla portugés) deklara ona kazu konfirmadu COVID-19 na’in-24 no provável na’in-haat rekuperadu hotu ona maibé daudaun profisionál saúde sira nafatin halo vijilánsia tanba moras ne’e sei nafatin eziste iha nasaun viziñu sira.
“Iha loron-13 fulan ne’e Governu sei bá Parlamentu no Primeiru-Ministru rasik hamutuk ho membru Governu hotu sei halo debate no responde kona-ba ezijénsia Parlamentu nian ba Estadu Emerjénsia ne’ebé mak ramata ona no mós atuasaun saida mak Governu halo relasaun ho COVID-19,” tenik Ministru Asuntu Parlamentár no Komunikasaun Sosiál, Francisco Martins da Costa Jerónimo hafoin ramata reuniaun regulár ho PM Taur iha Palásiu Governu, segunda ne’e.
Nia hatutan, Xefe Governu konkorda katak iha loron ne’ebé termina sei marka prezensa iha PN hodi responde ba ezijénsia sira ne’e.
Jornalista: Antónia Gusmão
Editora: Julia Chatarina