Prezidente Em Exercicio UDT Rudolfo Henrique Aparicio. Imajen/ Egas Cristóvão

AINARO, 04 jullu 2020 (TATOLI)-Estrutura Nasionál Partidu União Demokrátiku Timorense (UDT), iha sábadu ne’e halo sorumutu ho estrutura nivél aldeia iha Betulala Suku Aituto, Postu Administrativu Maubisse Munisípiu Ainaro hodi hametin estrutura iha baze hodi hasoru eleisaun iha 2023.

Iha sorumutu ne’e fó mós pose ba estrutura foun suku Aituto nian hamutuk ema na’in 48.

Prezidente UDT, Rudolfo Hendrique Aparíçio, hateten reprezenta estrutura Partidu UDT Nasionál agradese ba militante no simpatizantes partidu nian tanba nafatin fó konfiansa ba ejisténsia Partidu istóriku ne’e.

“Ita tenke mantein nafatin, ami nasionál la’o fila-fali hodi re-organiza atu 2023 hodi kompete iha eleisaun,” dehan Prezidente Partidu UDT hafoin fó pose ba estrutura partidu nian iha Aldeia Betulala Suku Aituto, sábadu ne’e.

Rodolfo dehan atu kompete ho partidu seluk iha eleisaun jerál 2023, estrutura baze tenki hametin liután estrutura tuir mehi Saudoso Prezidente UDT, Gilman Exposto nian.

“Ami sei la’o ba fatin hotu la’ós iha ne’e de’it hodi bele koalia ba militante hotu nune’e iha 2023 ita-nia kadeira bele aumenta iha Parlamentu Nasionál,”nia hateten.

Iha biban hanesan Sekretáriu Jerál Partidu UDT, David Xaviér Carlos, husu ba jerasaun UDT nian kaer metin prinsipiu partidu nian.

“Husu ba imi hotu jerasaun UDT tenke kaer metin prinsipiu UDT, bainhira jerasaun foun agora nia aman fó an ba mate tanba UDT ikus nia sama ses hosi nia aman nia ain fatin ida ne’e labele tenke hakat tuir nafatin prinsipiu fundamentál ne’ebé sira iha hodi fó valorizasaun ba sira,”nia apela.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here