Sekretáriu Estadu Kooperativa, Elizário Ferreira no Ministru Koordenadór Asuntu Ekonómika, Joaquim Amaral, ho komitiva komemora loron internasionál kooperativa iha Fundasaun Hanai Malu, Bairro Pité, domingu (05/07). Imajen/Natalino Costa

DILI, 05 jullu 2020 (TATOLI) – Relasiona ho komemorasaun loron internasionál kooperativa, Sekretáriu Estadu Kooperativa, Elizário Ferreira hato’o mesajen importante tolu ba membru kooperativa sira, nune’e bele dezenvolve di’ak liután setór kooperativa iha Timor-Leste.

Tema ba komemorasaun loron Internasionál kooperativa ba dala-98 tinan ne’e iha Timor-Leste maka “Asaun Kooperativa ba Asaun Klimátika”.

“Ohin ita komemora loron internasionál kooperativa nian, mensajen internasionál kooperativa nia maka, dahuluk iha vida kooperativa tenke iha auto jestaun oinsá maka halo jestaun rasik ba kooperativa no ba membru sira atu asegura membru sira,” dehan Sekretáriu Estadu Elizário Ferreira iha ámbitu komemorasaun loron internasionál kooperativa  ne’ebé hala’o iha Fundasaun Hanai Malu, Bairro Pité, domingu ne’e.

Mensajen segundu maka atu serví ba membru sira tanba kooperativa moris atu vida finanseira no ekonómiku ba nia membru sira bele asegura bem estar sosiedade no populasaun jerál.

Mensajen ikus liu maka objetivu sosiál katak koperativa ne’e atu hala’o atividade negósiu, ezemplu hanesan kréditu sira atu sosa no fa’an osan.

“Agora sira ne’ebé naun produtivu hala’o hela atividade hanesan hakiak animál sira no fa’an modo, ne’e hotu parte ida husi atividade sosiál  ne’ebé maka iha,” nia akresenta.

Governante ne’e esplika, iha kooperativa kréditu rendimentu hotu ne’ebé kooperativa hetan sempre fahe ba nian membru sira porsentu 40, enkuantu ba kooperativa rasik porsentu 60.

“Fila ba membru kooperativa sira ne’e atu asegura institusionalizaun koooperativa nian no atu asegura vida ekonómiku membru kooperativa nian,” nia subliña.

Iha komemorasaun loron internasionál kooperativa, Sekretaria Estadu deklara vizaun katak husi tinan ne’e to’o 2023, objetivu ne’ebé atu atinje maka harii sosiadade ida ho kultura organizasaun forte finansialmente no ekonómikamente.

Daudaun membru kooperativa  kréditu iha Timor-Leste rejista hamutuk 15.892 iha munisípiu 12 inklui Rejiaun aadministrativa Espesiál Oé-cusse Ambeno (RAEOA) no dadaun ne’e Governu liuhosi Sekretaria Estadu Kooperativa (SEKoop) planeia atu konsolida tan kooperativa naun kréditu.

Iha fatin hanesan, Ministru Koordenadór Asuntu Ekonómika, Joaquim Amaral, hateten Governu iha obrigasaun hodi insentiva grupu kooperativa ne’ebé eziste iha Timor-Leste tanba Kooperativa nu’udar setór importante husi pilár ekononomia nasaun ne’ebé maka konsagra iha Konstituisaun.

“Governu Komprometidu atu apoia nafatin setór kooperativa hanesan pilár ekonomia importante ne’ebé atu dinamiza ekonomia iha baze tanba iha situasaun pandemia hanesan COVID-19, maski ita liu ona maibé atu halo rekoperasaun ekonomia maka presiza halo atividade ekonomia barak iha setór oinoin, hanesan setór kooperativa,” nia akresenta.

Apoia ne’ebé Governu fó maka nafatin kria kondisaun liuhosi eskema finanseiru sira ne’ebé aplika tuir lei ne’ebé iha hanesan eskema sira ne’ebé iha ona.

“Ita ajuda guia sira ba setór produtivu, ne’ebé hanesan setór sira ne’ebé tuir Estadu hanesan prioridade, atu nune’e bele hasa’e produsaun  hanesan grupu kooperativa sira ita haree hodi hadi’a sira nian ekonomia familiár hanesan fó apoiu ba sira hakiak ikan, hakiak manu, halo to’os no seluk tan”, hateten Joaquim Amaral.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here