iklan

DILI

Jornalista Sei Sai Alvu ba Lei Kriminaliza Difamasaun

Jornalista Sei Sai Alvu ba Lei Kriminaliza Difamasaun

Prezidente Asosiasaun Jornalista Timor Lorosa’e (AJTL), Zevonia Vieira. Imajen Rita Almeida.

DILI, 04 jullu 2020 (TATOLI)–Prezidente Asosiasaun Jornalista Timor Leste (AJTL), Zevonia Vieira, hateten jornalista sira sei sai alvu ba iha lei kriminalizasaun defamasaun tanba jornalista mak sei transmite informasaun hosi fonte sira ba públiku.

Notísia Relevante: AJTL Hili Virgílio “Lamukan” Guterres Reprezenta Jornalista iha CI

Nia hatutan, ho konstituisaun RDTL ne’ebé mak di’ak, halo Timor-Leste hetan ranking ne’ebé di’ak ba liberdade imprensa no espresaun iha sudueste aziatiku no espera TL nia rangking sei la monu tanba de’it lei kriminaliza difamasaun

“Jornalista mak sei sai alvu ba iha lei kriminalizasaun defamasaun tanba jornalista mak sei transmite informasaun hosi fonte ba públiku. TL nia liberdade imprensa no espresaun iha Sudueste Aziatiku hetan rangking 1 no iha mundiál ita hetan númeru 78. Ida-ne’e imajén ne’ebé di’ak tebes tanba ita moris iha nasaun ne’ebé demokratiku ho ita-nia konstituisaun ne’ebé di’ak no hetan ranking ne’ebé di’ak. Ita hotu espera, ita-nia rangking sei la monu tanba de’it lei kriminaliza difamasaun,” dehan Zevonia Vieira iha ninia diskursu abertura iha konferensia AJTL, iha Salaun Delta Nova, Dili, sábadu ne’e. 

Nia hatutan, liuhosi konferénsia ida-ne’e presiza hanoin hamutuk hili figura ida-ne’ebé mak bele reprezenta AJTL, jornalista tomak no ba ema hotu ne’ebé defende direitu umanu hodi lori aspirasaun ho brani no kontra lei difamasaun no influénsia polítika ne’ebé mak bele da’et mai iha sala redasaun sira ka karik bele mós akontese iha CI laran. 

“Tanba lei difamasaun no influénsia polítika mak dalan ida atu hamate ita-nia liberdade imprensa no espresaun iha Timor-Leste. Ha’u hatene katak ita hotu lakohi ida-ne’e atu akontese. Ita presiza figura ida-ne’ebé mak bele reprenzenta ita hotu, iha abilidade no kapasidade atu sai lideransa ne’ebé lori duni lian hosi jornalista, asosiasaun no lian direitu umanu nian,” nia dehan.

Nia dehan, presiza figura ida-ne’ebé mak bele iha vizaun ida atu dezenvolve mídia iha Timor-Leste ne’ebe di’ak liután no bele ajuda jornalista sira iha kapasidade tékniku, ajuda jornalista sira sai kritiku liu, intelektual no professional, hodi bele lori AJTL nia ezinjensia ba iha CI.

“Hodi nune’e bele halo mundansa ne’ebe ita hotu hakarak atinji. Katak, Timor-Lese iha ona jornalista sira ne’ebé mak prontu atu kompete ho nasaun dezenvolvidu sira seluk. Tan ne’e, liuhosi konferénsia ida-ne’e mai hamutuk, hodi hili ema ne’ebé mak hakarak no iha interese duni hodi dezenvolve mídia iha Timor-Leste,” nia hateten. 

Importante liu, nia dehan, iha nia periodu ida ne’ebé bele halo influénsia ba polítika na’in sira atu bele retira projetu lei difamasaun no aprosima polítika na’in sira atu labele halo influénsia ba servisu jornalizmu nian, kontinua respeita servisu jornalista nian hanesan profisaun ida. Bele aprosima mídia na’in sira atu bele respeita mós jornalista sira-nia dereitu nu’udar ema servisu profesionál ida.

“Ita presiza figura ne’ebé mak bele aprosima orgaun sira hanesan seguransa no defeza, atu respeita servisu jornalista nian, bainhira halo servisu fatin públiku. Tanba realidade hatudu katak iha tinan hirak liu ba, iha jornalista balun mak sai vítima tanba hetan baku hosi membru polisia banhira sira halo kobertura. Ita presiza figura ida-ne’ebé mak bele halo komunikasaun di’ak ho públiku no mós polítiku na’in sira kona-ba servisu jornalizmu nian, liuhosi mídia literasia ne’ebé organiza hosi CI,” dehan Prezidente AJTL.

Jornalista : Osória Marques

Editór      :  Cancio Ximenes

iklan
iklan

Leave a Reply

iklan
error: Content is protected !!