Embaixadóra Estadus Unidus Amerika, Kathleen M. Fitzpatrick. Imajen/Egas Cristovão

DILI, 04 jullu 2020 (TATOLI)-Estadu Unidus Amérika liuhosi United States Agency International Development (USAID) sei oferese millaun $ 9.55 hodi implementa programa advokasia liliu ba Governasaun di’ak ba ONG lokál 10 durante tinan lima iha Timor-Leste.

Organizasaun Naun Govermentál lokál 10 maka selesionadu hodi partisipa iha programa ne’e hodi foka liu ba  fortalesimentu institusionál, peskiza, haluan rede kooperasaun no hasa’e kapasidade finansiál.

Ojetivu husi programa ne’e maka tulun ONG lokál sira hodi hadi’a abilidade no feramenta sira atu forñese servisu advokasia sustentavel ne’ebé bazeia ba evidensia no aspirasaun sidadaun Timor-Leste nian.

Embaixadora Estadus Unidus Amérika iha Timor-Leste, Kathleen Fitzpatrick,anunsia inisiativa ne’e parte husi selebrasaun loron independensia EUA iha ne’ebé monu iha loron 04 fulan jullu 2020. EUA deklara ninia independensia iha 04 julli 1776.

“Iha Estadus Unidus no Timor-Leste, ONG sira nia papel krusiál iha advokasia ba direitu sira no nesesidade sidadaun hotu nian,”dehan, Embaixadóra EUA liuhosi komunikadu imprensa ne’ebé TATOLI, asesu sábadu ne’e.

Nia haklaken, TL iha komunidade ONG ne’ebé forte dezde independensia maibé ONG barak ne’ebé mak foin harii iha limitasaun abilidade atu halo advokasia tanba menus kapasidade administrativa no apoiu finanseiru ne’ebé sustentavel.

“Estadus Unidus oferese apoiu ba sosiedade sivil liu husi apoiu finansiamentu ba ONG lokal ki’ik sira liu husi programa kapasitasaun ho eskala bo’ot hanesan ida ne’e. Ami espera atu servisu hamutuk ho Timor-Leste nia ONG progresivu sira liu husi advokasia ba governasaun diak,”tenik tan.

Ho nune’e, programa advokasia ba Governasaun di’ak ida sei oferese formasaun tékniku no apoiu seluk  nune’e ONG sira-nia servisu sustentavel liu no bele reprezenta di’akliu sidadaun sira-nia interese ba Governu.

Counterpart Internasional, kompañia dezenvolvimentu globál ho baze iha Estadus Unidus maka selesionadu hodi implementa programa ne’e.

Iha biban hanesan Diretór USAID iha Timor-Leste, Jim Wright, hateten ho programa ne’ebé iha sei fó apoiu ba programa Governu nian di’ak liu.

“Ha’u haksolok ho programa ne’e, tanba sei apoiu liután ami-nia asistensia atuál ba instituisaun governu sira nian liuhosi kriasaun parseria ho ONG sira,”dehan Jim Wright.

Nia hatutuan ho esperiensia no matenek entre organizasaun sira ne’e, bele apoia hadi’a lei no polítika sira no kontribui ba Timor-Leste nia dezenvolvimentu sosiál no ekonomia.

USAID nia programa advokasia ba Governasaun di’ak ne’e sei fokaliu ba objetivu ha’at mak hanesan, adiak ONG sira-nia kapasidade administrativu no organizasionál hadiak sira nia advokasia, peskiza, abilidade analítiku no parseria atu bele responde ba aspirasaun sidadaun sira-nian, hadi’a jestaun no rendimentu regular no diversu sira ONG nian promove ambiente favorável atu ONG sira sai independente liután.

Nia dehan kualidade ONG sira-nia sei aju Governu sai akuntavel liután no transparente inklui reseptivu ba interese públiku, hodi apoiu governu ida ne’ebé solidu no justu.

Atividade ne’e sei hametin sistema demokrasia atu ajuda nasaun ne’e nia progresu ba auto-sufisiensia.

Jornalista  : Hortencio Sanchez

Editór        : Agapito dos Santos

HAKEREK NO HATÁN

Please enter your comment!
Please enter your name here