Jerente Programa IRI, Karlito Nunes

DILI, 03 jullu 2020 (TATOLI)–Organizasaun The Internasional Republican Institute (IRI) realiza meza redonda ho Sosiedade Sivíl no Deputadu Parlamentu Nasionál Timor-Leste hodi ko’alia kona-ba impaktu hosi implementasaun Estadu Emerjénsia ba dezenvolvimentu sosiál, ekonómia no medida prevensaun COVID-19 iha Timor-Leste.

Notísia Relevante: Durante EE, FOKUPERS Rejistu Kazu Violénsia Hasoru Feto no Labarik Hamutuk 23

Jerente Programa IRI, Karlito Nunes, hateten meza redonda ida-ne’e hala’o ba dala-hitu ho objetivu oinsá sosiedade sivíl sira ne’ebé durante ne’e halo advokasia servisu iha área Saúde, Edukasaun no Agrikultura no mós Infraestrutura báziku ne’ebé maka sira ida-idak sei hato’o nia servisu durante ne’e ba membru Parlamentu Nasional sira.

“Objetivu ida-ne’e kria espasu para oinsá ita-nia sosiedade sivíl sira bele hato’o sira-nia dadus, o  informasaun no rezultadu advokasia durante hala’o servisu iha terrenu hodi hato’o ba deputadu sira tanba sira mak sai tilun, liman ain povu nian iha uma-fukun Parlamentu Nasionál,” dehan Karlito Nunes ba jornalista sira iha Salaun Reuniaun TOWER CONFERENCE, Fatuhada, Dili, sesta ne’e.

Nia hatutan, ohin, sosiedade sivíl sira ida-idak hato’o ona sira-nia prepkupasaun no rekomendasaun ba deputadu sira. Deputadu sira konkorda para sei utiliza no sei uza informasaun sira-ne’e, bainhira iha diskusaun ba iha komisaun nomós halo diskusaun iha plenária ka enkontru ho ministériu relevante bele halo diskusaun hodi atende preokupasun povu nian.

“Ohin sosiedade sivíl sira ida-idak hato’o ona sira-nia preokupasaun no rekomendasaun ba deputadu sira  no informasaun sira ne’ebé mak ohin fahe ona  ba  membru parlamentu sira. Deputadu sira konkorda para sei utiliza no sei uza informasaun sira-ne’e ba sira-nia dispozisaun. Deputadu Antoninho Bianco promete katak ba oin sei  nafatin halo audiénsia sira hanesan ne’e ho sosiedade sivíl,” nia dehan.

 Partisipante sira ne’ebé partisipa iha meza redonda ne’e mak FONGTIL, Timor-Leste Coalition For Education (TLCE), Organizasaun Forum Komunikasaun ba Feto Timor-Leste (FOKUPERS), KIF KAEBAUK, Crus Vermelha Timor-Leste (CVTL), no mós marka prezensa hosi unidade auditoriál sosiál husi Gabinete Primeiru Ministru no reprezentante membru Parlamentu Nasionál husi Komisaun D, E, F, no G.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here