Serimonia haloot mate-isin saudoza Adelia Soares Martins Sarmento "CristaL" iha Jardim dos Erois Metinaro, Dili, sesta (03/07/2020). Imajen/Rita Almeida.

DILI, 03 jullu 2020 (TATOLI) – Fundadór Organizasaun Sagrada Família (OSF), Cornelio Gama “L-7”, hateten OSF halibur ema hotu hosi loromonu, lorosa’e, tasi feto no tasi mane, hosi Jaco no Tutuala hodi fiar ba Na’i Maromak nia ukun fuan katak hadomi na’in Maromak mesak ida de’it no hadomi ema seluk hanesan ita-aan rasik mak hodi manan funu.

Notísia Relevante: Eroina “Cristal”: “Ami Feto Timor Aseita Mate, Duké Atan Ba Militár Indonézia Sira”

Cornelio Gama “L-7” hatutan, OSF entrega fita mean-mutin ba feto no ba mane entrega fita mean-metan.

“Ho ida ne’e, OSF entrega fita mean-mutin ba feto no mane entrega fita mean-metan”, dehan L-7 iha ninia diskursu iha serimonia haloot mate-isin saudoza “CristaL” iha Jardim dos Erois Metinaro, sesta ne’e. 

Organizasaun la’o haleu ona Timor-Leste hanesan bee ida karik sulin to’o fatin hotu-hotu no ikus mai maluk sira hosi ai-laran mai simu fita.

Atuál deputadu iha Parlamentu Nasionál ne’e hatete, OSF nu’udar komponente rezisténsia ida ne’ebé mak uluk halibur timoroan hotu ho nia prinsípiu ida de’it katak mate ka moris ukun rasik-aan hodi liberta rai ida-ne’e hosi kolonializmu sira mak ohin loron Timor-Leste hetan ona nia ukun rasik-aan.

Entretantu, reprezenta família eroina “Cristal”, Julião da Costa Xavier, agradese ba Governu tanba haloot ona eroina ‘Cristal’ iha Jardin Metinaru.

“Ami agradese ba ita-boot sira tanba ohin loron ita bele haloot ita-nia alin no feton ‘Cristal’ iha semitériu eroi sira iha Metinaru ne’e”, dehan Julião da Costa Xavier.

Ho ida ne’e, família matebian husu lider istóriku sira ne’ebé mak uluk luta ba Timor-nia indepedensia, atu kuidadu malu no dezenvolve nasaun ne’e ba oin.

Imajen/Rita Almeida.

“Iha rezisténsia ne’ebé mak ita luta no la’o hamutuk hodi liberta rai no nasaun ida-ne’e, ita-boot sira tenke esforsu hodi kuidadu malu nune’e lori nasaun ne’e ba oin. La’ós ita tuur de’it iha fatin hanesan iha Parlamentu Nasionál ne’ebá mak loro-loron meza no kadeira tarutu hela de’it maibé ko’alia mak sira-nia de’it la’ós ko’alia povu nia moris no dezenvolvimentu ba rai ida-ne’e nian,” nia dehan. 

Nia husu ba lider istóriku sira atu fó hanoin no fó laran ba malu atu bele deside nasaun ne’e no povu ne’e nia moris tanba povu halerik no povu terus ona ba rai ne’e, tanba ne’e nu’udar representante povu iha uma fukun presiza iha unidade.

“Ho ida ne’e, ami hili ita-boot sira atu reprezenta ami povu nia lian iha Parlamentu Nasionál. Maibé labele hanoin mak poder mak importante ba imi-nia aan maibé hanoin povu nia nessesidade,” nia hateten. 

Realidade tanba ema barak terus ona, entaun iha tempu ida-ne’e mak bele hasoru malu hodi ko’alia ba malu maibé lahanoin atu halo asaun no hanoin mak atu ko’alia ba malu kona ba nasaun ne’e nia destinu.

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here