Primeiru-Ministru, Taur Matan Ruak partisipa preparasaun Loron Nasionál Funsaun Públika ba daneen, iha Ministériu Finansa, Aitarak-Laran, sesta (03/07). Imajen Tatoli/Egas Cristovão

DILI, 03 jullu 2020 (2020) – Primeiru-Ministru (PM), Taur husu ba servidór Estadu sira atu servisu ho domin hodi serví Estadu no povu ho di’ak, tanba servisu mak laho domin maka sei labele la’o ho di’ak.

Xefe Governu afirma, sistema atu la’o ho di’ak presiza halo reforma administrasaun públika ida ne’ebé mais efisiente no efikásia posível.

“Sistema bele di’ak to’o iha ne’ebé maibé ema ladi’ak maka sistema ne’e la funsiona. Entaun elementu prinsipál ne’ebé halo sistema ne’e labele la’o mak ema, tanba ne’e presiza domin ba misaun no vokasaun, ne’e importante. Vokasaun ne’e mai husi formasaun sira,” hateten PM Taur iha ámbitu enkontru preparasaun Loron Nasionál Funsaun Públika ba daneen ne’ebé hala’o iha salaun Ministériu Finansa, Aitarak-Laran, sesta ne’e.

Tuir eis Jenerál FALINTIL-Forsa Defeza Timor-Leste (F-FDTL), administrasaun públika bainhira kompara karik hanesan tropa, ne’ebé tropa di’ak ida nia preparadu atu halo funu, trava kombate no manan kombate.

“Bainhira tropa ida maka atu halo kombate hotu maka nia sei lakon de’it, tanba ne’e presiza muda katak ne’e iha problema ruma,” nia akresenta.

PM Taur nota, iha administrasaun públika kuandu sistema di’ak, maibé rekursu umanu laiha kapasidade maka administrasaun públika ne’e sei labele la’o ho di’ak tanba ne’e Governu tenke investe iha rekursu umanu.

“Ita tenke investe ba kualidade rekursu umanu la’ós kuantidade, tanba kualidade mak halo diferensia, satán ita haree mundu ohin loron teknolojia kuaze inseparável iha ema-nia vida. Ita presiza hadi’ak buat barak iha reforma administrasaun públika,” nia realsa.

Tuir PM, reforma ne’ebé daudaun ne’e Governu halo la’ós de’it iha rekursu umanu maibé funsionalizmu públiku jerál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here