Sekretária Estadu Igualdade no Inklusaun, Maria Jose da Fonseca Monteiro de Jesus. Imajen/ Egas Cristovão

DILI, 03 jullu 2020 (TATOLI)–Sekretária Estadu Igualdade Inkluzaun (SEII), Maria José da Fonseca Monteiro de Jesus, hateten iha tempu badak SEII sei reativa fali grupu traballu jéneru nian iha Rejiaun Administrativu Espesiál Oé-Cusse Ambeno (RAEOA) tanba durante taka tiha.

“Ita sei reativa fila fali grupu traballu jéneru iha RAEOA ne’ebé durante ne’e taka tiha. Tanba, durante ne’e grupu traballu jéneru para tiha ho estabelesimentu RAEOA nian, nune’e grupu traballu jéneru labele kontinua ho nia programa,” dehan Sekretária Estadu Igualdade Inkluzaun, Maria José da Fonseca Monteiro de Jesus, ba Agência TATOLI liuhosi entrevista iha edifisíu SEII, Obrigado barak, Matadoru, Dili, kinta ne’e. 

Nia hateten, iha mudansa ida iha RAEOA tanba uluk grupu traballu jéneru ne’e hanesan ho munisipál sira seluk maibé agora RAEOA mosu ho nia estatutu hanesan espesiál ida entaun estensaun servisu sentrál tenke liuhosi fali autoridade RAEOA nian, bainhira halo rezolusaun Governu nian hodi hadi’a rezolusaun anterior kona-ba grupu traballu jéneru.

“Iha ne’ebá ita la haree RAEOA ninian maibé SEII presiza akordu ida ho RAEOA hodi bele hatutan servisu SEII nian iha RAEOA inklui estabelese reativa fila fali grupu traballu jéneru nian,” nia dehan. 

Nia relata, durante ne’e SEII hala’o ona enkontru ho Prezidente Autoridade Munisípiu sira hotu atu oinsá mak bele kontinua transmite informasaun kona-ba grupu traballu jéneru ba iha munisípiu sira.

“Durante ne’e, ami hala’o ona diskusaun ho Prezidente Autoridade no administradór Munisípiu sira hotu atu oinsá mak ita kontinua servisu SEII nian iha munisípiu hotu inklui ita sei asina akordu ida ho RAEOA,” nia esplika.

Jornalista : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here