Deputadu sira hosi Komisaun A PN hala'o diskusaun ba LAC iha iha Mukit Guest House Aisirimou Aileu, sesta (03/07/2020). Imajen/Mídia CAC.

AILEU, 03 jullu 2020 (TATOLI)–Proposta hosi diretór Polisia Sientífika Investigasaun Kriminál (PSIK) kona-ba atu estabelese Konsellu Kombate Korrupsaun ne’ebé submete direta ba iha governu nia okos, iha diskusaun Lei Antí Corrupção (LAC) ba sesaun dahuluk ba projetu Lei númeru 1/V/I/-Lei Anti Corrupção (LAC) ne’ebé hala’o Manufahi (24-26 juñu 2020) la pasa iha diskusaun. 

Proposta ne’e ikus mai la pasa iha diskusaun, tanba deputadu sira maioria la konkorda atu hamosu órgaun foun ida ne’ebé mós implika Orsamentu Orsamentu Jerál Estadu (OJE), nune’e, deputadu sira konkorda liu atu Konsellu Kombate Korrupsaun hola parte iha estrutura CAC nian.

Prezidente Komisaun A Parlamentu Nasionál, Joaquim dos Santos, hateten proposta ne’e la pasa tanba prosesu halo lei ne’e sempre rona opiniaun hosi públiku inklui PSIK ne’ebé fó mós ninia hanoin. Kuandu deputadu sira konkorda bele aprezenta ba meza, nune’e meza baixa ba diskusaun no halo aprovasaun.

Notísia Relevante: Diskusaun LAC, PSIK Propoin Estabelese Konsellu Kombate Korrupsaun

“Deputadu sira maioria ladún konkorda hodi hamosu órgaun foun ida ne’ebé mós implika Orsamentu Jerál Estadu (OJE). Tanba ne’e, deputadu sira konkorda liu atu Konsellu Kombate Korupsaun halo parte iha estrutura CAC nian, la presiza harii ketak hanesan Diretór PSIK propoin durante diskusaun iha Manufahi foin lalais ne’e,” Deputadu Joaquim dos Santos esplika ba Agência TATOLI iha Mukit Guest House Aisirimou Aileu, kinta ne’e. 

Deputadu ne’e dehan, Konselu Kombate Korrupsaun tama iha CAC depois mak halo norma adisionál atu bele reforsa servisu konselu nian iha instituisaun ne’e.

Antes ne’e, nia dehan, durante inísiu diskusaun iha Otél Uma Liurai, Ailok Laran, Babulo Same-Manufahi, iha intervensaun, Komisáriu CAC Sérgio Hornai mós la konkorda atu estabelese tan konsellu foun. 

Maibé, tuir Prezidente CAC presiza de’it atu halo ajustamentu internál ba dekretu-lei sira iha CAC hodi kria unidade ida própriu ho ninia tarefa atu haree ho konsentrasaun oinsá halo polítika prevensaun liuliu iha deklarasaun bens no interese sira.

“Ha’u ho ha’u-nia estrutura mai partisipa iha diskusaun LAC ne’e ho hanoin ida atu kontribui ho deputadu sira katak la’ós ona nesesáriu atu halo tan sesaun ka komisaun bara-barak. Tanba, ita presiza de’it atu optimaliza komisaun sira ne’ebé mak iha atu bele simplifika no mós fó efetividade servisu ne’e ba oin,” Sérgio Hornai hateten.

Komisáriu ne’e hatutan, iha prinsípiu tenke iha lei ida ne’ebé ko’alia kona-ba polítika prevensaun no presiza iha estratejia nasionál ida, presiza iha órgaun própriu atu implementa tantu iha politika prevensaun iha ninia espesialidade no kompeténsia ba CAC iha diresaun prevensuan ne’ebé tutela ba iha inspesaun no monitorizasaun hodi promove valorizasaun no integridade.

“Tanba ne’e ita presiza halo de’it ajustamentu internál internal dekretu-lei sira CAC nian, liuliu iha estrutura orgánika hodi kria unidade ida própriu ho ninia tarefa atu haree ho konsentrasaun oinsá atu halo politika prevensaun liuliu iha deklarasaun bens no interese sira,” nia dehan. 

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here