Primeiru-Ministru, Taur Matan Ruak. Imajen Tatoli/Egas Cristovão

DILI, 03 jullu 2020 (TATOLI) – Primeiru-Ministru (PM), Taur Matan Ruak krítika servisu Autoridade Aduaneira ka Alfándega no Polísia Nasionál Timor-Leste (PNTL) nian tanba durante ne’e halo apreensaun ba sasán sira maibé rai to’o estraga no lori ba sunu.

Tuir Xefe Governu katak, tuir loloos sasán sira ne’ebé halo apreensaun rai didi’ak hodi bele halo leilaun fali ba públiku nune’e bele hatama reseita ba Estadu.

Atuál Ministru Interiór ne’e nota, PNTL Unidade Tránzitu durante ne’e liuhosi auto stop ba transporte públiku sira tantu motór no kareta, halo apreensaun ba transporte sira maibé tau de’it iha arredór PNTL nian no ikusmai sasán sira ne’e a’at.

Nune’e mós ba Alfándega, sasán sira ne’ebé halo apreensaun rai de’it iha armajen to’o dodook no dalan ikus tenke lori ba hakoi no sunu.

Tanba ne’e, Xefe Governu sujere relasiona ho transporte públiku sira bainhira halo auto stop no sira ne’ebé kontra kódigu estrada ka kontra regulamentu tráfegu, presiza aplika kedas multa iha terrenu.

“Husu na’in ba sasán sira ne’e fó de’it osan no husik sira lori nafatin sira-nia transporte, tanba loron-loron halo ida-ne’e maka to’o tempu sira na’in rasik sente katak hasai osan selu boot liu fali sosa sasán foun,” hateten PM Taur iha ámbitu enkontru preparasaun Loron Nasionál Funsaun Públika ba daneen ne’ebé hala’o iha salaun Ministériu Finansa, Aitarak-Laran, sesta ne’e.

PM haktuir, nia parte konvida ona Vise-Ministru Interiór hodi ko’alia kona-ba lejizlasaun atu regula transporte ne’ebé la kumpre kódigu estrada.

“Foin lalais ha’u ko’alia ho Vise-Ministru Interiór katak ita presiza osan maibé kuandu halo lei apreensaun motór, maka tau hamutuk iha eskuadra Polísia to’o feruzen, balun lori tán ba uma ona karik se mak hatene? Bainhira ha’u presiza osan, ha’u ba foti motór halo saida?”, nia realsa.

Relasiona ho Alfándega, xefe Governu ladún konkorda ho sasán apreensaun ne’ebé rai to’o a’at.

“Ita-nia Alfándega sira bainhira halo apreensaun ba sasán, ikusmai lori ba sunu. Nusa mak la leilaun tiha hodi hetan fali osan no hatama ba kofre Estadu? Paíz sira riku liu ne’e dehan, ne’e sukata, maibé ita-nia sukata sei bele uza, ita halo-an hanesan paíz riku,” nia lamenta.

Hatan ba preokupasaun Xefi Governu, Diretór Jeral Alfándega, José António Fátima Abílio, klarifika katak sasán sira ne’ebé servisu Alfándega halo apreensaun ne’e maihusi sasán ne’ebé tama maihusi estranjeiru no laiha dokumentu.

Tuir Jerente ne’e, Alfándega halo destruisaun tanba sasán balun liu ona prazu no labele konsumu tanba afeta ba saúde públiku.

“Kona-ba sasán apreensaun sira ne’e, haree katak iha sasán barak mak kleur hela tanba ita haree ba iha lei sira-ne’e dala ruma prosesu iha parte seluk ami mós iha koordenasaun ona ho Ministériu Públiku relasaun ho apreensaun sira ne’ebé mak ami halo partisipasaun ba sira,” nia subliña.

Apreensaun balun ne’ebé mak viola regra administrativa maka Alfándega sei aprezenta ba ministériu relevante hodi avansa ho prosesu leilaun.

“Sasán sira ne’ebé to’o ona Ministériu Públiku ne’e relasaun ho krime no sira ne’ebé deside sunu ne’e liu ona prazu no labele halo leilaun tanba bele afeta ba saúde públiku,” nia akresenta.

Diretór Jerál ne’e dehan, Alfándega bele halo apreensaun ba sasán sira ne’ebé viola regra aduaneira no la tuir prosedimentu tranzasaun internasionál nian.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here