Ekipa nasionál MSSI fó formasaun ba ekipa pagamentu iha RAEOA kona-ba oinsa atu atende benefisiáriu sira iha fatin pagamentu. Imajen/Facebook.

DILI, 03 jullu 2020 (TATOLI)–Ekipa nasionál hosi Ministériu Solidariedade Sosiál no Inkluzaun (MSSI), ohin, ensera formasaun ba ekipa pagamentu iha Rejiaun Administrativu Espesiál Oé-Cusse Ambeno (RAEOA).

Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten ekipa nasionál fó formasaun ba ekipa pagamentu iha RAEOA kona-ba oinsa atu atende benefisiáriu sira iha fatin pagamentu.

“Ita hosi nasionál ba RAEOA iha loron 01 jullu hodi halo preparsaun ba sensibilizasaun kona-ba programa pagamentu ba ita-nia autoridade sira no mós ami fó formasaun bai ta-nia ekipa pagamentu hamutuk na’in-18 hosi RAEOA nian,” Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, ba Agência TATOLI via telefonika, sesta ne’e.

Hafoin formasaun ramata, nia dehan, ohin kontinua fali monta instrumentu ba fatin pagamentu hanesan tali rafia hodi bele halo distánsia entre ema ida ba ema seluk inkui prepara ekipamentu prevensaun nian ba iha fatin pagamentu.

Aleinde ne’e, nia hateten, hafoin ne’e ekipa balun hamutuk ho xefe suku sira foti osan iha Banku Sentrál Nasionál Timor Leste (BNCTL), nune’e aban (04/07/2020) RAEOA halo ona prosesu pagamentu ba benefisiáriu sira iha RAEOA ne’e.

Tuir nia, fó formasaun ba ekipa pagamentu no autoridade suku sira kona-ba baze legál ne’ebé mak uza hodi implementa subsídiu ne’e rasik. Baze legál seluk mak dekretu prezidente repúblika ne’ebé mak deside no deklara ona Estadu Emerjénsia (EE), depois bazeia ba diploma dekretu lei númeru 15/2020 ne’ebé mak ko’alia kona-ba subsídiu uma-kain ne’e rasik no diploma ministeriál konjunta nian.

Nia haktuir, matéria seluk mak mekanizmu pagamentu nian iha fatin pagamentu no mós esplika ba autoridade sira kona-ba benefisiáriu ne’ebé mak elizivél no lae.

“Ita mós fó esplikasaun ba sira kona-ba distansiamentu fíziku no sosiál ba autoridade sira bainhira implementa prosesu pagamentu tenke autoriza ba benefisiáriu tenke kumpre regra hirak ne’e,” tenik deretór ne’e.

Totál benefisiáriu iha RAEOA hamutuk 20.032 no osan $4.000.0000 ba postu administrativu Haat, suku 18 no aldeia 63, ho durasaun pagamentu loron 10 nia laran.

Jornalista : Osória Marques 

Editór       :  Cancio Ximenes

HAKEREK NO HATÁN

Please enter your comment!
Please enter your name here