Prezidente Komisaun ba Elaborasaun Planu Rekuperasaun Ekonómika, Rui Augusto Gomes. Imajen Tatoli/António Gonçalves

DILI, 03 jullu 2020 (TATOLI) – Iha semana daruak servisu Komisaun Planu Rekuperasaun Ekonómika hafoin membru sira simu pose iha 18 juñu, konsege rekolla ona informasaun husi entidade oinoin.

“Iha semana daruak nia-laran, Komisaun Planu Rekuperasaun Ekonomia hafoin situasuan COVID-19 hala’o sorumutuk lubun iha ámbitu rekolla informasaun, dadus, rona hanoin no aspirasaun husi parte oinoin,” relata Prezidente Komisaun Planu Rekuperasaun Ekonómika, Rui Augusto Gomes, liuhosi nota imprensa ne’ebé Agência Tatoli asesu iha sesta ne’e.

Entidade hirak ne’ebé kontribui hanoin maka Kámara Komérsiu no Indústria Timor-Leste (CCI-TL, sigla portugés), empregadór sira, reprezentante sosiedade sivíl, komunidade akadémika husi universidade no instituisaun ensinu superiór, banku komersiál sira, Banku Sentral, instituisaun Estadu sira no parseiru kooperasaun.

Komunikasaun ho entidade hirak ne’e la’o daudaun no komisaun mós hala’o hela analize ba dadus estatístika ne’ebé iha nu’udar pasu importante atu identifika fatór sira ne’ebé bele estimula ka impede kresimentu ekonómiku.

Estadu Emerjénsia ne’ebé foku ba jestaun situasaun, atu Timor-Leste labele monu iha estremu ida.

Nune’e mós, VIII Governu esforsu atu asegura nesesidade bázika sidadaun-sira nian no iha tempu hanesan mantein parte ekonomia atu labele fraku liu.

“Iha faze ne’e, importante tebes intervensaun Estadu atu retoma konfiansa husi sidadaun no nesesáriu mós katak rendimentu ne’ebé lakon ka tun bele rekupera filafali,” Rui Gomes subliña.

Haree oportunidade preparasaun Orsamentu Jerál Estadu ba tinan fiskál 2020, maka iha semana ida ne’e nia-laran Prezidente Komisaun hamutuk ho Vogál sira diskute ona kona-ba medida balun atu responde ba situasaun hafoin COVID-19.

Nune’e, Prezidente Komisaun sei aprezenta ba Primeiru-Ministru, Taur Matan Ruak, hodi tetu proposta medida sira ne’ebé hetan konkordánsia iha komisaun nia-laran.

“Iha faze Estadu Emerjénsia resposta sira husi VIII Governu hatudu prova afirmasaun Estadu ba problema sosiál liuhosi sistema protesaun sosiál. Proposta ho medida-sira temporária ne’ebé sei aprezenta iha semana ida-ne’e ba konsiderasaun VIII Governu sei kobre períodu kurtu-prazu (jullu to’o dezembru 2020).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here