Prezidente Komisaun Funsaun Públika, Faustino Cardoso Gomes. Imajen Tatoli/Egas Cristovão

DILI, 03 jullu 2002 (TATOLI)–Prezidente Komisaun Funsau Públika (KFP), Faustino Cardoso hateten, ohin, simu orientasaun pontu rua hosi Primeiru-Ministru, Taur Matan Ruak, kona ba bens estar no seguransa.

“Aspetu importante ida mak oinsá rasionaliza situasaun funsaun públika entermu kuantidade no kualidade funsionionáriu. Ita agora aposta ho kualidade invez númeru funsionáriu ne’ebé mak ba auto-reforma. Nune’e bele muda mentalidade no pensamentu para oinsá mak bele hakbiit ba administrasaun nian no hakbesik ba povu nune’e bele hetan duni ba mehi ne’ebé mak iha hanesan bens estar povu nian no seguransa,” dehan Prezidente KFP, Faustino Cardoso, ba jornalista sira iha Ministériu Finansa, Aitarak-laran, Dili, sesta ne’e.

Prezidente KFP hatutan, objetivu hala’o enkontru ida ho Primeiru-Ministru, Taur Matan Ruak, atu rona direta orientasaun no polítika VIII Governu nian ba apoiu no espetativa problema saida mak durante ne’e KFP enfrenta liuhosi perguntas hosi partisipante sira hotu.

Ho ida ne’e, nia dehan, prioridade polítika VIII Governu Konstituisionál nian mak oinsá KFP bele kontibui tuir setór ida-idak nian no tuir kapasidade ne’ebé mak iha, nune’e atu bele alkansa mehi estadu nian no la’o tuir polítika VIII Governu ninian.

“Ohin, PM Taur Matan Ruak fó hanoin balun kona-ba prinsípiu sira balun kona-ba valór, kestaun sustentabilidade finanseira no kestaun efisiénsia, kestaun efikásia no kestaun reforma nian iha área ne’ebé mak VIII Governu define tiha ona,” nia dehan. 

Tanba ne’e, nia dehan, ohin PM mós husu atu funsionáriu hotu-hotu hahú kedas hosi diretór jerais, kargu xefia, bele sensivél ba situasaun no kompremete-aan atu oinsá hasa’e tiha mudansa servisu no haree liu ba rezultadu servisu, no tenta oinsá mak bele motiva sira kraik ne’e, atu servisu di’ak liután hodi bele hakbesik ba mehi bens estar povu nian.

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here