DILI, 03 jullu 2020 (TATOLI)-Diretór Jerál Ensinu Sekundáriu husi Ministériu Edukasaun Juventude no Desportu (MEJD), Deolindo da Cruz, hateten Ministériu Edukasuan liuhosi Diretór Munisipál sira konsege halo ona verifikasaun ba Eskola Tékniku Vokasionál no Ensinu Sekundária Jerál hamutuk 80 kona-ba sira ninia preparasaun hodi re-ativa prosesu aprendizajen.
Totál Eskola Tékniku Vokasionál ho Sekundáriu Jerál hamutuk 161, Ensinu Sekundáriu Jerál iha 103 kompostu públiku 98 no CAFE hamutuk tolu, no mós Tékniku Vokasionál 58.
Eskola sira ne’ebé re-ativa ona ne’e tanba prienxe ona padraun prevensaun COVID-19, hanesan instala ona tanke bee moos no torneira fase liman, uza máskara, prepara sabaun, iha hand sanitizer, garante distansia sosiál ba estudante no profesór.
Notísia Relevante :Eskola Sekundáriu 50 Re-Ativa Ona Prosesu Aprendizajen
“Ami simu ona informasaun husi Diretór Edukasaun Munisipál sira katak sei falta Eskola Tékniku Vokasionál no Sekundáriu Jerál 81 mak seidauk verifika maibé, eskola sira ne’e preparadu hotu ona problema mak parte Ministériu Saúde seidauk disponível hodi tuun ba eskola sira hodi sertifika,” dehan nia ba TATOLI, iha ninia servisu fatin.
Eskola Sekundáriu Jerál 98 ne’ebé verifikadu, nia tenik tan daudaun ne’e sira-nia prosesu aprendizajen la’o ona, no falta de’it Sentru Apendizajen no Formasaun Eskolár (CAFE) lima maka seidauk tanba Profesór Portuguesa sira fila hotu ba Portugál relasiona ho surtu COVID-19.
Notísia Relevante :Governu Husu Eskola Sira Kumpre Nafatin Padraun Prevensaun COVID-19
Enkuantu, husi parte Eskola Tékniku Vokasionál 58 nian, Deolindo esplika eskola 22 verifikadu no hahú ona sira-nia prosesu aprendizajen, 36 sei iha prosesu verifikasaun. Eskola TECVOC 58 ne’e kompostu husi públiku 43 no privada 15.
Hosi eskola sekundáriu jerál 103 ne’e, sira ne’ebé maka pertense ba Governu nian hamutuk 43, Igreja nian 46, Fundasaun sira iha sia no eskola CAFE hamutuk lima.
Eskola hirak ne’e ejiste iha Munisípiu Aileu hamutuk hitu, Baucau 18, Bobonaro na’in neen, Covalima iha Rua, Dili iha 24, Ermera iha hitu, Lautem iha eskola lima, Liquiça iha neen, Manufahi iha Lima, no Rejiaun Administrativa Espesiál Oé-Cusse Ambeno (RAEOA).
Jornalista : Tomé Amado
Editór : Agapito dos Santos
