Primeiru-Ministru, Taur Matan Ruak. Imajen/Egas Cristovão

DILI, 03 jullu 2020 (TATOLI) – Primeiru-Ministru (PM), Taur Matan Ruak, hateten fatór polítika rai-laran no pandemia COVID-19 impede polítika VIII Governu atu kria postu servisu ba joven sira hamutuk 60.000 kada tinan.

“Programa VIII Governu ambisiozu ba kriasaun 60.000 empregu, ne’ebé fó kontribuisaun ba tinan-lima bele redúz pobreza porsentu 10 hela tiha ba mehi tanba fatór barak la konsege realiza no ita tama fali faze dolorozu demais ba ita-nia ekonomia iha nasaun,” tenik PM Taur bainhira partisipa iha enkontru preparasaun Loron Nasionál Funsaun Públika ba daneen iha salaun Ministériu Finansa, Aitarak-Laran, sesta ne’e.

Daudaun ne’e hafoin Timor-Leste livre husi surtu COVID-I9, hahú tama ba iha polítika estabilizasaun no rekoperasaun ekonómika no kresimentu.

“Hafoin pandemia, ita ba estabiliza rekoperasaun hafoin tinan rua tolu provavelmente bele ba rekoperasaun ne’ebé sedu di’ak liu, se lae lori tempu oituan,” nia akresenta.

Xefe Governu haktuir, durante Estadu Emerjénsia, Governu realiza pagamentu subsídiu ba kada família hetan $200 iha faze dahuluk.

“Hotu-hotu ne’ebé simu saláriu $500 ba kraik iha direitu simu ida ne’e. Ita iha problema dadus, maibé ita konsege implementa faze halo transferénsia $200 iha munisípiu 12 la inklui Oé-cusse,” nia realsa.

Tuir eis Xefe Estadu, maski prosesu pagamentu subsídiu $200 ne’e difísil iha munisípiu 12 maibé Governu konsege realiza pagamentu no laiha diskriminasaun entre agregadu família sira ne’ebé mak rendimentu diferente.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here