Membru PN hosi Bankada FRETILIN, Antoninho Bianco. Imajen/ Egas Cristovao

DILI, 3 jullu 2020 (TATOLI)—Deputadu Bankada FRETILIN, Antoninho Bianco, konkorda ho esbosu-lei ne’ebé oras ne’e prepara hosi Governu liuhosi Ministériu Justisa (MJ) hodi kriminaliza difamasaun tanba difama selu labele konsidera kazu sivíl.

Notísia Relevante: CEPAD Espera Implementasaun LAC Labele Hasoru Intervensaun Polítika

“Ha’u konkorda ho esbosu-lei kriminaliza difamasaun tanba difama ema ne’e krime. Esbosu-lei ne’e hanesan konseitu ida tanba Governu hanoin katak difama ema ne’e tuir konstituisaun krime,” dehan Deputadu Antoninho Bianco ba Agência TATOLI liuhosi entrevista iha salaun Konferénsia Tower, Fatuhada, Dili, sesta ne’e.

Nia haktuir, iha governasaun dahuluk FRETILIN hakarak difamasaun ne’e kriminaliza tanba konstituisaun mak fó dalan maibé la konsege, oras ne’e atu hamoris ne’e pertinente.

Deputadu Antoninho Bianco afirma, se Governu sente difama ne’e krime hanesan prevee iha konstituisaun RDTL artigu 36 entaun pertinente.

Notísia Relevante: CI iha Papél Importante Kontra Esbosu-Lei Kriminaliza Difamasaun

Maske nune’e reprezentante povu ne’e rekoñese esbosu-lei ne’e hetan krítika maka’as hosi sosiedade sivíl maibé povu rasik mós hanoin lei ne’e fó dalan ema labele hatete ema arbiru de’it.

Deputadu FRETILIN ne’e subliña, Timor-Leste presiza iha duni lei hodi kriminaliza tanba oras ne’e ema-nia dignidade ne’e laiha ona.

Nia argumenta, demokrasia labele dehan la dignifika ema hanesan ema, tanba ema balun dehan tenke livre hatete buat hotu-hotu, hatete ema-nia dignidade sai ba públiku tanba Liberdade expresaun maibé ema labele hatete ema seluk arbiru ligadu ho ema-nia dignidade.

Tanba tuir nia, dignidade ema ho Liberdade espresaun maibé dignidade ema ne’ebé ofendidu tenke balansu, la’ós espresa hanoin ho livre maibé la respeita ema-nia dignidade.

“Ne’e mak pro no kontra iha ne’e. Iha mundu ne’e só Timor de’it mak hateten aat ita-nia líder istóriku sira, líder órgaun soberanu sira. Ita labele konsidera difamasaun ne’e kazu sivíl. Tanba ne’e, ha’u konkorda tanba la’ós ita espresa ita-nia hanoin hodi viola ema seluk nia dignidade. Ne’ebé, ha’u konkorda maibé depende ba Governu. Se Governu halo desizaun depois parlamentu mós tenke hola desizaun,” nia hateten

Nia dehan, desizaun depende ba governu no parlamentu katak dignidade liuhosi difamasaun ka desvaloriza ema-nia dignidade.

Notísia Relevante: Ministériu Públiku Pro ba Lei Kriminaliza Difamasaun

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here