Sekretáriu Estadu Juventude no Desportu, Abrão Saldanha. Imajen/SEJD

DILI, 02 jullu 2020 (TATOLI) – Sekretáriu Estadu Juventude no Desportu, Abrão Saldanha, hasoru malu ho Primeiru-Ministru hodi ko’alia kona-ba atividade juventude no desportu iha Timor-Leste.

Iha sorumutu ne’e, Xefe Governu husu Sekretaria Estadu Juventude no Desportu (SEJD) hodi haree joven potensiál sira ne’ebé envolve iha Grupu Arte-Marsiál (GAM) bele re-integra iha sosiedade no enkuadra ba dezenvolvimentu nasionál.

“Primeiru-Ministru husu ba Sekretaria Estadu Juventude no Desportu atu enkuadra joven sira iha prosesu dezenvolvimentu atu ajuda sira iha planu moris iha área juventude ne’ebé destake espesiál ida mak arte-marsiál, oinsá mak halo esforsu hodi re-integra sira iha sosiedade no diskobre poténsia ne’ebé iha hodi kontribui ba dezenvolvimentu nasionál,” relata Sekretáriu Estadu Abrão Saldanha hafoin ramata enkontru ho PM Taur iha Palásiu Governu, kinta ne’e.

Relasiona ho atu integra fali joven husi GAM ba sosiedade, Governu hasai ona rezolusaun ida hodi reativa GAM tolu ne’ebé antes ne’e bandu atu hala’o atividade, tanba ne’e tuir governante ne’e SEJD iha devér atu halo akompañamentu ba sira-nia atividade no kria lejizlasaun ida hodi regula sira-nia atividade.

Notísia Relevante: KM Aprova Rezolusaun Reativa Arte-Marsiál

“Agora iha prosesu re-integrasaun ho lei ne’ebé mak iha hodi bele halo regulamentu sufisiente ba atividade no ajuda sira organiza-an atu nune’e bele lori joven sira ne’ebé iha arte-marsiál ba dezenvolvimentu nasionál.

Nia sente previléjiu ida asume pasta Sekretáriu Estadu Juventude no Desportu tanba bele inisia lejizlasaun ne’ebé defende juventude sira.

“Ha’u kontente tebes asume pasta ida-ne’e tanba ho hanoin katak bele kria lejizlasaun ruma atu regulariza sira-nia organizasaun rasik, sira-nia valór ne’ebé sira tenke defede iha sira-nia organizasaun, sertifikasaun ba sira nia kuríkulu rasik. Ida-ne’e diálogu permanente ho sira liuhosi Komisaun Reguladora Arte-Marsiál,” Abrão subliña.

Iha loron 19 fevereiru, Governu liuhosi reuniaun Konsellu Ministru aprova Proposta Rezolusaun Governu ne’ebé aprezenta hosi Primeiru-Ministru, Taur Matan Ruak, ba revogasaun Rezolusaun Governu númeru 16/2013 10 jullu, ne’ebé bandu GAM hala’o atividade.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here