DILI, 02 jullu 2020 (TATOLI)- Primeiru-Ministru no Ministru Interiór, Taur Matan Ruak, ohin, hala’o primeiru enkontru ho Vise Ministru Interiór (MI), António Armindo, hodi fó orientasaun polítika ba Vise MI hodi prepara aprezenta estatutu Polísia Nasionál Timor-Leste (PNTL), lei orgánika Ministériu Interiór no lei orgánika Servisu Migrasaun Timor-Leste ba Konsellu Ministru.
Notísia Relevante : Komandu PNTL Simu Ona Lista Kona-ba Komandante Balun “Juramentu” Ba GAM
Vise Ministru Interiór, António Armindo dehan, prosesu atu revee estatutu PNTL ne’e, eis Ministru Interiór interinu, Filomeno da Paixão de Jesus, aprezenta ona ba Konsellu Ministru, maibé seidauk hetan aprovasaun.
Ba jornalista sira iha Palaçio do Governo, Vise MI António Armindo, informa PM Taur rasik fó orientasaun ba nia parte ho asesór tékniku sira atu haree didi’ak estatutu PNTL nian hodi hadi’a ninia redasaun sira hodi aprezenta ba reuniaun Konsellu Ministru iha semana oin.
Hatán kona-ba lei dixiplinár PNTL nian ne’ebé Konsellu Ministru aprova iha semana kotuk, Vise Ministru António dehan, nia parte seidauk haree klaru kona-ba redasaun hosi lei ne’e, maibé nia fiar katak, lei dixiplinár PNTL ne’ebé aprova ona bele ezekuta ho di’ak hosi parte komandu PNTL.
Kona-ba lamentasaun públiku sobre atuasaun PNTL iha terrenu dala barak uza forsa hodi viola direitu umanu, Vise Ministru ne’e hateten, Governu ne’e mai ho nia polítika klaru atu eduka forsa implementa lei, respeita regra no direitu sidadaun sira nian.
“Ita mai ho filozofia ida klaru katak, ita hakarak polísia sai hanesan anjo da guarda ba povu, fó treinamentu di’ak ba polísia sira tenke kontinua la’o,” nia hateten.
Vice Ministru Interiór promete sei koordena nafatin ho Komandu PNTL oinsá maka bele hadi’a profisionalizmu no atitude membru PNTL hotu-hotu atu halo atuasaun ruma tenke haree ba nia sirkunstánsia hotu atu labele viola povu nia direitu.
“Bainhira membru polísia sira kontinua viola regra no la respeita ierarkia, sei hetan kastigu tuir lei dixiplinár ne’ebé aprova ona,” António Armindo hateten.
Jornalista : Eugénio Pereira
Editór : Francisco Simões
