Abitante timoroan tama mai Timor-Leste liuhosi fronteira terrestre Motain, Bobonaro, kuarta (24/06/2020). Imajen/dok. privadu

DILI, 02 jullu 2020 (TATOLI) –Abitante Timoroan na’in-55, kuarta horiseik, tama tan mai territóriu Timor-Leste liuhosi fronteira terrestre Motain, Munisípiu Bobonaro.

Notísia Relevante : Kada Kuarta, Governu Loke Portaun Fronteira Terrestre

Raul Lemos ho nia espoza Krisdayanti (KD). Imajen/Google

Bainhira hakur liu mai territóriu Timor-Leste nian iha Motain, Ministériu Saúde prepara kedas transporte hodi transporta Timoroan hirak-ne’e mai Dili submete ba konfinamentu obrigatóriu ka kuarentena durante loron-14 nia laran tuir orden hosi Ministériu Saúde (MS) ho Organizasaun Mundial Saúde (OMS) atu bele prevene propagasaun surtu Coronavirus ka COVID-19.

Sidadaun sira-ne’e maioria mai hosi nasaun afetadu surtu COVID-19, liu-liu mai hosi area jurizdisaun  Repúblika Indonézia nian ne’ebé oras ne’e nu’udar nasaun ka rai ida ne’ebé sofre direita ba propagasaun peste letál COVID-19.

Hosi abitante hirak ne’ebé submete ba konfinamentu obrigatóriu iha Tasi-Tolu, Dili, ne’ebé estabelese hosi Governu, sidadaun na’in-lima kompostu hosi Padre na’in-haat ho  Raul Lemos, nu’udar emprezáriu nasionál, submete de’it ba auto-kuarentena iha sira ida-idak nia rezidénsia.

Raul Lemos, diva Pop Indonézia atuál membru Parlamentu Nasionál Repúblika Indonézia  (DPR-RI sigla Indonézia), Krisdayanti (KD) nia kaben ne’e halo auto-kuarentena iha nia rezidénsia iha Kampu Alor, Dili no na’i-lulik hirak ne’e auto-kuarentena iha sira nia konventu.

Ho autorizasaun ba Raul Lemos halo de’it auto-kuarentena iha nia rezidénsia privadu, hamosu duvida hosi abitante Timoroan sira seluk ne’ebé tama mai Timor-Leste.

Balun tau iha kestaun no balun halo kritika hodi dehan, karik tanba Raul Lemos iha osan tanba ne’e la bele tama iha konfinamentu obrigatóriu no balun fali konsidera, ne’e ezemplu ladi’ak no hamosu injustisa boot.

Eis Portavóz CIGC atua Diretora Jerál Prestasaun Servisu Saúde, Odete da Silva Viegas. Imajen/Egas Cristovão

Responde ba preokupasaun no duvida sira kona-ba aplikasaun auto-kuarentena ba Raul Lemos ne’e, Diretora Jerál Prestasaun Servisu Saúde, Ministériu Saúde (MS),  Odete da Silva Viegas, klarifika katak, ba abitante Timoroan ne’ebé tama mai Timor-Leste, ekipa vijilánsia Ministériu Saúde  aplika mekanizmu rua; ida mak konfinamentu obrigatóriu ka kuarentena no seluk fali mak auto-kuarentena. Nune’e, kona-ba Raul Lemos submete ba auto-kuarentena iha nia rezidénsia de’it tanba  nia hato’o ona informasaun antes mai MS.

“Ema mós bele iha auto-kuarentena, agora  Raul Lemos no padre na’in-haat mós auto-kuarentena hotu. Tanba sira informa ba ami antes no ekipa vijilánsia MS ba haree uluk tiha ona sira-nia fatin ne’ebé prova katak sira bele halo auto-kuarentena duni no tuir duni rekizitu auto-kuarentena nian,” esplika Odete Viegas, eis portavós Sala Situasaun Sentru Integradu Jestaun Krize (SS-CIGC).

Nia hatutan, padre na’in-haat ne’e, ohin dadeer, mak sai hosi konfinamentu obrigatóriu iha Tasi-Tolu, tanba horikalan la biban, nune’e, ohin mak padre sira-ne’e ba auto-kuarentena iha sira-nia konventu.

“Raul Lemos nia karreta mós ba to’o kedas iha Motain hodi nia rasik lori nia karreta ne’e akompaña hosi ekipa Ministériu Saúde no kalan ne’e kedas Polísia akompaña ba nia fatin. Atu dehan de’it katak, Raul ho padre na’in-haat sira-nia fatin ne’e, ekipa vijilánsia ba haree uluk tiha ona iha tersa (30/06/2020) no informasaun fó hatene antes ona molok sira  to’o mai Timor,” esplika Odete da Silva Viegas hodi responde Agência Tatoli via telefone, ohin.

Odete hatutan, Raul Lemos molok mai Timor-Leste nia informa ona ba Ministériu Saúde hodi husu auto-kuarentena no ekipa vijilánsia Saúde nian ba tiha ona halo inspesaun iha Raul Lemos nia fatin ne’ebé prova katak prienxe duni rekizitu sira auto-kuarentena nian.

Fó hanoin fali katak, Raul Lemos nia situasaun ne’e atu hanesan mós ho Arsenio Bano, atuál prezidente Autoridade RAEOA nian, ne’ebé uluk tama hosi Australia mai Timor-Leste submete ba auto-kuarentena iha nia rezidénsia privadu tanba situasaun hotu prienxe rekizitu auto-kuarentena nian.

“Abitante Timoroan seluk, (la inklui padre na’in-haat ho Raul Lemos), sira kumpre hela konfinamentu obrigatóriu iha Tasi-Tolu tanba la iha informasaun antes,” esklarese Odete da Silva Viegas.

Jornalista     : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here