Diretór Ezekutivu SERVE, Florêncio Sanches. Imajen Tatoli/António Gonçalves

DILI, 02 jullu 2020 (TATOLI) – Diretór Ezekutivu Servisu  Rejistu Verefisaun Emprezariál  (SERVE) Florêncio Sanches, hateten servisu rejistu ne’e deside ona atu halo revizaun ba Lei SERVE nian atu fó oportunidade ba setór privadu no  investór sira halo atividade ekonómika iha rai-laran ho di’ak liután hodi bele hatama reseita ba Timor-Leste.

“Ohin SERVE aprezenta ona proposta revizaun ba iha Señor Ministru Koordenadór Asuntu Ekonómiku, Joaquim Amaral, ba lei sira ne’ebé maka fó kompetésia ba SERVE hanesan Lei Sosiedade Komersiál, Lei Rejistu Komersiál no Lei Atividade Ekonómiku”, dehan Diretór ne’e ba Agência Tatoli  hafoin ramata enkontru ho Ministru, Joaquim Amaral, iha Palásiu Governu, kinta ne’e.

Tuir Jerente Servisu Rejistu ne’e, lei tolu ne’e agora daudaun iha ona prosesu nia-laran no parte Governu apoia hodi aselera revizaun.

Nia haktuir, iha enkontru ne’e Ministru konkorda tebes atu aselera tanba bainhira lejizlasaun ne’e mak halo revizaun, sei promove setór privadu no investór sira atubele fó oportunidade halo atividade ekonómika di’ak nune’e bele kontribui reseita ba Estadu.

Florêncio Sanches subliña, iha nesesidade atu halo revizaun tanba hakarak atrai investór negosiante hala’o atividade ekonómika no iha tempu hanesan SERVE haree hafoin ezisténsia iha tinan-hitu kontribuisaun setór privadu ba Estadu boot tebes.

“Ita respeita kontribuisaun setór privadu nian tanba boot tebes liuhosi taxa ne’ebé sira kontribui pelu menus konsege selu ona verba saláriu no vensimentu Estadu nia. Tanba ne’e, Señor Ministru konkorda tebes atubele haka’as lalais no kontinua finaliza lei sira ne’e,” nia akresenta.

Iha fatin hanesan Ministru Kordendór Asuntu Ekonómiku, Joaquim Amaral, haktuir enkontru ohin atu rona servisu saida maka parte ajénsia auténomu sira halo.

“Enkontru ne’e ha’u bolu sira mai hakarak rona ajénsia sira ne’e nia servisu saida maka sira halo ona atu nune’e hanesan ministériu tutela bele apoia malu liuhosi desizaun polítika ne’ebé ita sei halo ba oin mai. Servisu no desizaun saida maka husi parte ajénsia halo, nu’udar parte Governu sei apoia ba inisiativa atu nune’e  bele haburas ita-nia ekonómia di’ak liután,” nia afirma.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here