Ilustrasaun

DILI, 02 jullu 2020 (TATOLI)-Sentru Saúde Becora rejista ona pasiente ho moras dengue hamutuk 122 durante fulan neen nia laran hahú janeiru to’o juñu.

Xefe Sentru Saúde Becora, Adelina Pinto, hateten pasiente hirak ne’e balun baixa iha fatin ne’ebá no balun tenki transfere bá iha Ospitál Nasionál Guido Valadares (HNGV-sigla portugés) tanba sofre moras ne’e ho kondisaun grave maibé la rejulta ema mate.

“Komesa fulan-janeiru to’o juñu ami hala’o prevensaun liuhusi abate  ba iha fatin risku sira nune’e mós halo fogin ba área sira ne’ebé mak afetadu,”dehan nia ba Jornalista Sira iha Becora.

Nia esplika Suku Bekora, Suku Kuluhun , Bidau Santana, Suku Hera, no Suku Camea maka durante ne’e afetadu tebes ba dengue.

”Ami halo prevensaun ba komunidade sira ne’ebé mak afetadu ami uza karreta multi funsaun hodi aviza ba aldeia sira atu hamoos uma ninin sira labele so’e fo’er arbiru no hamoos bee tanke sira para susuk labele tolun iha laran,” Nia dehan.

Tuir orariu husi Sentru Saúde Beccora, iha loron 06 fulan jullu sei halo advokasia ba komunidade sira iha nivel aldeia hodi hasa’e  konsiensia komunidade ba prevene moras dengue.

Jornalista : Felicidade Ximenes

Editór       : Agapito dos santos

HAKEREK NO HATÁN

Please enter your comment!
Please enter your name here