Sekretária Estadu Igualdade no Inkluzaun (SEII), Maria José da Fonseca Monteiro de Jesus  hateten, ohin, SEII halo enkontru regulár ho Prezidente Autoridade no Administradór Munisípiu sira. Imajen/

DILI, 02 jullu 2020 (TATOLI)–Sekretária Estadu Igualdade no Inkluzaun (SEII), Maria José da Fonseca Monteiro de Jesus  hateten, ohin, SEII hala’o enkontru regulár ho Prezidente Autoridade no Administradór Munisípiu sira hotu.

Iha enkontru ne’e, Maria Fonseca hatutan, atu ko’alia kona-ba regularmente atu kontinua atualiza informasaun kona-ba promosaun ba igualdade jéneru iha munisípiu to’o iha suku no aldeia sira ne’ebé mak seidauk hatene informasaun kona-ba promosaun ne’e.

“Ohin loron mós ita ko’alia kona ba servisu no prorama SEII nia iha munisípiu sira maski ita iha prezidente autoridade hodi lidera maibé ita haree katak iha nivél munisípiu ladún la’o ho di’ak. Tanba, ita sei iha lakuna no dezafiu boot ida, ba responsavél administradór sira mak boot liu,” dehan Maria José da Fonseca Monteiro de Jesus, ba jornalsita sira iha salaun SEII Obrigado Barak, Matadoru, Dili, kinta ne’e. 

Tuir nia, dalaruma ema haree promosaun igualdade jéneru ne’e buat kiik-ona ida maibé ita haree di’ak katak metade populasaun ne’e feto. Hosi ne’e, nia dehan, Timor-Leste iha mós ema ho defisiénsia no mós ema ho orientasaun seksuál, labarik, idoza ne’ebé mak halo parte iha sosiedade.

Entaun, nia haktuir, ho situasaun ida-ne’e mak lideransa sira iha munisípiu ladún haree ka foka ba kestaun ne’e.

“Ho ida-ne’e mak ami hakarak haree atu oinsá mak fó apoiu di’ak liután ba autoridade munisípiu sira ba grupu oin-oin iha área rural sira, liuliu iha suku no aldeia sira”, nia dehan.

Jornalista : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here