Antigu Ospitál Indonézia, Wirahusada, Lahane. Imajen tatoli/António Gonçalves

DILI, 02 jullu 2020 (TATOLI) – Ospitál Lahane ne’ebé maka antes ne’e Governu planeia atu sai fatin izolamentu ba pasiente COVID-19 nian, dadaun ne’e Governu hahú halo ona reabilitasaun hodi prepara ba tratamentu moras grave.

Ministra Saude, Odete Freitas, hateten dadaun ne’e governu hahú ba fase reabilitasaun óspital Lahene no fatin ne’e sei uza ba kazu ba moras bo’ot sira.

“Ospitál Lahene  sira (traballadór) halo ona reabilitasaun no fatin ne’e sei uza ba moras todan,” dehan Ministra Saúde, Odete Freitas ba Agência Tatoli, iha Palásiu Governu, foin lalais ne’e.

Antigu Ospitál Indonézia, Wirahusada, Lahane. Imajen tatoli/António Gonçalves

Tuir governante ne’e, Governu la’ós halo de’it reabilitasaun ba iha Ospitál Lahene maibé deside ona atu halo reabilitasaun ba fatin izolamentu iha Tasi Tolu.

Reabilitasaun ba ospitál ne’ebé tempu governasaun Indonézia hanaran Wirahusada ne’e, provizóriamente sai hanesan fatin izolamentu ho kuartu 150, liu-liu kazu sira ne’ebé maka grave, maibé iha futuru sai hanesan ospitál.

Orsamentu ba reabilitasaun edifísiu Lahane prevee ona iha Orsamentu Jerál Estadu (OJE) 2019 ho valór $300.000 resin ne’ebé sei tau fasilidade saúde no ekipamentu serbisu sira.

Antigu Ospitál Indonézia, Wirahusada, Lahane. Imajen tatoli/António Gonçalves

Rezultadu konkursu públiku ba ezekusaun obra reabilitasaun Ospitál Lahane ne’e hatudu katak kompañia Barnabak maka agora halo hela prosesu estudu ne’ebé aprezenta ona ba Governu hodi hasa’e kapasidade akomodasaun ospitál antigu ne’e.

Antes ne’e, Ministru Obra Públika, Salvador Eugênio Soares dos Reis Pires, informa kona-ba abitante sira ne’ebé daudaun ne’e okupa hela antigu ospitál ne’e, parte kompañia no Governu sei haree kestaun impaktu sosiál no ambientál hodi trata ho dignu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here