Ministru Turizmu, Komérsiu no Indústria, José Lucas do Carmo Silva. Imajen Tatoli/Egas Cristovão

DILI, 02 jullu 2010 (TATOLI) – Primeiru-Ministru (PM), Taur Matan Ruak realiza enkontru dahuluk ho Ministru Turizmu, Komérsiu no Industria, José Lucas do Carmo da Silva, hodi fó orientasaun ba implementasaun programa Governu.

“Sei foku ba turizmu rai-laran hodi prepara infraestrutura bázika, nune’e mós iha área industria. Primeiru-Ministru orienta mós haree industria ki’ik-oan iha rai-laran hodi haforsa liután. Iha komérsiu ninia mak kona-ba produtu sira ne’ebé mak iha hodi asesu ba merkadu tanba ita prodúz ona maibé maibé presiza kria kondisaun hodi fa’an produtu iha merkadu,” relata Ministru José Lucas hafoin enkontru ho Xefe Governu, iha Palásiu Governu, kinta ne’e.

Biban hanesan, PM mós orienta atu Ministériu Turizmu, Komérsiu no Industria (MTKI) halo koordenasaun di’ak ho ministériu hotu no haree ba programa anuál, inklui programa MTKI nian iha rejionál no Internasionál.

Nune’e mós, Xefe Governu husu ministériu ne’e hodi kria programa ne’ebé haree ba nesesidade sosiedade nia ligadu ho surtu COVID-19 iha rai-laran.

Governante ne’e afirma, área ne’ebé sei foka liu iha tempu badak mak hanesan área turizmu, komérsiu no industria.

Iha programa VIII Governu Konstitusionál iha área turizmu, Governu sei ho forma planeada no organizada atu dezenvolve estratejia ida ba turizmu iha rejiaun no la buka kompete ho turizmu boot iha Sudeste Aziátiku maibé bele kria sinerjia ho lokalidade seluk iha rejiaun hanesan Flores, Molucas no Kupang, atu dezenvolve pakote turíztiku ne’ebé bele atrai vizitante husi Indonézia, Austrália no husi paíz seluk iha Ázia ho Pasífiku.

Enkuantu, iha área komérsiu, Governu sei kontinua implementa medida hodi regula atividade komersiál no aprova polítika ba espansaun merkadu inklui divulgasaun produtu ho valór ekonómiku akresentadu liuhosi estratejia merkadu-nian ho relasaun públika ne’ebé bele promove Timor-Leste ho ninia produtu iha rejiaun no mundu.

Iha setór industria,Timor-Leste iha kondisaun tomak atu dezenvolve industria subsidiária seluk ba dezenvolvimentu setór primáriu produsaun.

Timor-Leste bele mós aposta iha transformasaun matéria-prima ba embalamentu produtu, mobiliáriu, konstrusaun sivíl, entre buat seluk hodi multiplika oportunidade ba transformasaun rekursu naturál oinoin ba abastesimentu lokál no redúz nesesidade importasaun hodi ba ona esportasaun produtu orijinál ho valór akresentadu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here