Ministra Negósiu Estranjeiru no Kooperasaun, Adalgiza Albertina Xavier Reis Magno. Imajen Tatoli/Egas Cristovão

DILI, 02 jullu 2020 (TATOLI) – Ministra Negósiu Estranjeiru no Kooperasaun, Adaljiza Albertina Xavier Reis Magno, hateten traballadór timor-oan servisu iha Korea Súl ne’ebé kontratu mate maioria hakarak fila ona mai Timor-Leste, tanba ne’e daudaun Governu buka hela maneira ba traballadór sira.

“Governu bele buka maneira hodi traballadór sira hetan fali servisu maibé depende ba sira, maioria mak hakarak fila mai Timór”, hateten Ministra Adaljiza hafoin ramata enkontru ho Primeiru-Ministru, Taur Matan Ruak iha Palásiu Governu, kinta ne’e.

Governante ne’e hatutan, traballadór sira ne’ebé kontratu hotu ona no lakohi kontinua servisu iha empreza seluk, Governu sei fasilita sira lori fila.

“Sira tenke fila tanba sira la simu ona saláriu maibé sira preparadu atu selu sira-nia aviaun rasik mai to’o Singapura no Governu fasilita to’o mai Timór ne’e sei iha opsaun,” nia akresenta.

Notísia Relevante: SEFOPE Prevee $94.000 Lori Fila Traballadór Husi Korea no Australia Ne’ebé Kontratu Hotu

Daudaun parte Ministériu Negósiu Estranjeiru no Kooperasaun (MNEK) halo hela kontaktu ho Embaxada Timor-Leste iha Korea Súl atu fasilita traballadór sira.

“Entre atu mai agora ka hein to’o sira balun nia kontratu ramata iha jullu maka mai dala-ida. Tanba bainhira lori balun mai, balun sei iha ne’ebá. Tanba ne’e di’ak liu hein tán sira seluk kontratu hotu mak lori hamutuk mai,” nia subliña.

Tuir Ministra, bainhira traballadór sira ne’e la fila maka afeta tebes ba sira tanba laiha ona osan atu selu hela fatin tanba sira la simu ona saláriu.

Bazeia ba dadus husi Sekretáriu Estadu Formasaun Profisionál no Empregu (SEFOPE), katak traballador iha Korea hamutuk na’in-86.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here